India-in Windies an hneh

India leh West Indies ten ODI match thum an khelh tura hmasa ber chu ruah sur vanga an khelh theih loh hnuin Pathianni khan ODI match hnihna khelh a ni a, Virat Kohli hote 59 runs in an chak.

Queen's Park Oval, Trinidad and Tobago-a inkhelah India-in bat hmasak an thlang. Captain Virat Kohli chuan run 120 zet a siam a, Shreyas Iyer-a'n run 71 siam bawkin over 50-ah 279/7 runs an siam. Kohli hian century a siam hma hian innings 11 chhung century a siam lo a, average erawh 47 a la ni pha tho.

Ruahsurin inkhel a tihbuai avangin D/L method hmangin Windies target chu run 270-ah thlak niin over 46-ah tih tlem sak an ni bawk.

India tan bowler Bhuvneshwar Kumar (31/4) a khel ṭha a, Windies hian over 42-naah run 210 siamin an thi vek.

Captain Kohli chuan, "Run 270 chu a ṭha tawk tih kan hria a, team-in a mamawh hun taka century ka siam thei hi ka lawm," tiin inkhelh banah a sawi.

India hian T20-ah Windies hi 3-0 in an hneh tawh a, ODI match thum khelh turah 1-0 in hma an hruai vek. ODI match hnuhnung ber hi August 14, Nilaini zan hian Queen's Park Oval-ah bawk khelh leh a ni ang.



Share this Post

Login to comment
No Comments