Serena hliam zanah Andreescu a champion

Pathianni zan khan Rogers Cup hmeichhe singles final khelh a ni a, champion tura rinkai Serena Williams chu a hnungzâng na vangin set khat pawh khel tluan loin a inhnukdawk - a khingpui  Bianca Andreescu chuan nomawi a chawi thung.

Centre Court-a inkhelah kum 37 mi Serena hi hliam vangin a buai a, set khatna an khelh laiin Canadian rawlthar zawkin 3-1 a hma a hruai laiin American star hi a inkhel zui thei tawh lo.

Grand Slam vawi 23 champion tawh Serena chuan, "Final khelh tluan ngei ka tum a, mahse ka taksa lamin a tlin ngang lo. Fans leh ka khingpui chungah hriatthiamna ka dil," tiin a sawi.

Rogers Cup bikah hian kum 2000 khan Serena hi hliam vangin a inhnukdawk tawh a, a inhnuhdawh hnuhnung zawk kum hian tun ṭuma a khingpui Andreescu hi a piang ve chauh a ni.

Kum 19 mi Andreescu hi 1968 hnua Canadian nula Rogers Cup nomawi chawi leh thei hmasa ber a ni. Andreescu chuan, "Sawi mai tur ka hre lo, Serena inhliam vanga lawm ka ni lo a, hlawhtlinna ka chan avangin ka hlim 

takzet," a ti.

August 27 aṭangin US Open khelh ṭan a ni leh tawh dawn a, kum 37 mi Serena hian an rama inelna lianah hian season hmasa final-a a hmingchhiat tawhna chu hliah khuh a tum ang.



Share this Post

Login to comment
No Comments