Goal liin sawifiah lo mah se goal li chu a tam Manchester United 4 - 0 Chelsea

Pathianni zan khan Ole Gunnar Solskjaer hoten Frank Lampard-a enkawl Chelsea 4-0 in an hneh. Manchester United hian kum 1965 hnua an muala Chelsea an hneh chian ber a ni a, Old Trafford-ah hlimna leh lawmna a thleng.

United tan Marcus Rashford-a'n goal hnih khungin Romelu Lukaku kalsan number 9 hatu Anthony Martial leh player thar Daniel James ten goal khat ve ve an khung bawk. Inkhel hun tam zawk thununtu Blues-in ṭum hnih woodwork an pet per chu goal-ah a luh si loh avangin league season vawi 104 a an bul ṭan chhiat ber ṭum an tawng.

A hming chu Rashford

Kum 2016 kumtir khan Marcus Rashford chu United player inhliam nasat vangin Europa League-a Midtjylland an hmachhawn ṭumin khelhna hun pek a ni a, goal hnih khungin European competition-a club legend George Best-a'n goal khung thei naupang ber record a chelh chu a khum. Ni thum hnuah Arsenal lakah goal hnih khungin assist vawi hnih a nei a, Premier League bikah Federico Macheda leh Danny Welbeck te chiah United tana goal khung naupang lamah tluk loh a nei.

Kum thum hnuah Rashford hian kar khatah £200,000 a hlawh tawh a, a theihna sang tak avangin vanglai hun hmang chho mek kum 26 mi Lukaku pawhin Inter Milan a pan phah hial. Norwegian manager Solskjaer-a'n thutlukna huai tak a siam chhan chu Chelsea an hmachhawn ṭumin a lang a, Rashford hian Kurt Zouma laka a penalty hlawhchhuah chu pet nghalin goal-ah a chantir. Chhinchhiahtlak lai erawh Gianluigi Buffon goal vena penalty khung tawhtu Rashford hian World Cup nomawi chawi tawh Paul Pogba aiin penalty pet mawhphurhna a chang.

Rashford hian second half-ah goal 

ṭha bik khungin Pobga laka a ball hmuh chu vawi hnih khawih lekah khawvel keeper manto ber Kepa Arrizabalaga dan hman lohin goal kilah a khung. English striker hi kum 21 mi lek ni mah se mual chhungah chuan player puitling a ni tawh a, United innghahna a ni.

AM9 leh James

Kum 2015 khan Anthony Martial-a'n jersey no. 9 nen United tan bul 

ṭanin an hmelma Liverpool lamah goal mawi a khung nghal. Mahse French forward hi beisei angin a che ṭha zui lo a, Zlatan Ibrahimovic-a'n a number hi rawn chhuhsakin Lukaku-a'n a rochun leh bawk. Tunah chuan Martial hian number 9 ha leh tawhin Chelsea nen hian minute 65-naah Andreas Pereira cross chu awmna tur taka a awm avangin awlsam hmel takin a khung. 

Solskjaer-a'n United manager a nih hnuah a player lakluh hmasak ber Daniel James pawh minute 74-naah a rawn lut a, Welsh winger hian minute 81-naah Pogba siamsak chu goal-ah a khung. James hi United a zawmfel hmain May thla khan a pa a thi a, goal khung zawha a kut khing hniha van lam a kawk chuan engkim a sawifiah.

A laia lam 'Pogba'

Manchester United-in transfer-ah midfielder langsar an lalut lo a, amaherawhchu an neih sa Paul Pogba hi khawvela ṭha ber zinga mi a ni. French midfielder hi Real Madrid leh Juventus te nen la sawi zawm zel mah se Pogba hian Chelsea lakah a theihna a pholang a, Rashford goal khungna tura a ball pass 'cial' tak mai te chu midfielder inti nazawng pet theih chi a ni lo.

Season hmasa tawp lam khan Pogba hi United ṭantute lakah a tla tlum lo a, Chelsea nena an inkhelh zawhah erawh mipui lamah kal kualin a chhuak hnuhnung ber a ni. French midfielder hian sum tam tak hnawla United-in an chelh chhan a pholang a, team boruak tichhetu chauh tia seltuten ngawih an chuh leh rih a ngai dawn a ni.

Maguire leh AWB

Season liam ta khan Manchester United-in Old Trafford-ah clean sheet vawi hnih chiah an nei a, tun season-ah match khat chiah an la khel chungin a chanve chu an tlin der a, record ṭha zawk an nei ngei dawn. United hian pound maktaduai 80-a an lak Harry Maguire leh right back Aaron Wan-Bissaka te chu bul an ṭantir nghal a, tlarhnung tih phuina tura an nakruh bo chu an hmu ta niin a lang.

Maguire hian tlarhnung rawn ho ṭhain hun harsaah a talbuai lo a, Wan-Bissaka pawhin goal a nawr pui bakah Pedro a dah ṭha. United-in nipui transfer-a an sum hmanna a thlawn lo tih a lang a, chutihrualin Chelsea kim lo laka an talbuai avangin champion nomawi aiin Champions League khelh phak chu an thlen theih chin tur a la nih hmel.



Share this Post

Login to comment
No Comments