I Day Women's Football-ah VAKIRIA an champion

NEXA Independence Day Celebration Football-a hmeichhe pual inelnaah Vakiria FC chuan NCC FC 3-0 a hnehin an champion. 

Final hi Inrinni zan khan Lammualah khelh a ni a, Vakiria tan C. Zairemmawii'n goal hnih a khung bakah Grace H. Lalrampari'n goal khat a khung.

Vakiria FC captain K. Lalruatfeli chu best player atan thlan a ni a, champion team defender hian tlarhnung a veng phui ṭha hle. Subroto Cup khel tur tleirawl rual NCC FC chu Fair Play Award dawng tura thlan an ni. Nomawi hi August 15, Independence Day-ah hlan a ni ang.

Tawnhriat leh game plan

NCC FC-in Lalrintluanga (Saitea) hoin thla hnih training an nei tawh a, kum lamah naupang zawk mah se leiah ball an inpe kual ngamin game mumal tak an khel.

Vakiria coach H. Lalrem-ruata'n an khingpuite leh an team dinhmun a hriat chian avangin captain Feli hmangin tlarhnung a tiphui a,  ball inpe kual ve loin thupuiah 'safety first' an hmang a, defender-ten hmun himah ball an dah zel.

Vakiria forward C. Zairemmawi chuan defender ball petchhuah chu hmang ṭangkaiin minute 29-naah ball rawn put chu goal-ah a chantir a; Zaii bawk hian minute 10 hnuah yard 25 aṭangin freekick aṭangin goal mawi a khung.

Second half-ah NCC FC-in si phurh sut tumin nawr mah se Vakiria FC-in India aiawha khel zo hlim Grace-i an luhtir a, Salem Veng nula hian a class sanzia pholangin minute 66-naah keeper pet khumin chak nemnghehna goal a khung.

Hlawhtlinna

Mizo coach thawkrim ber zinga mi H. Lalremruata chuan, "Hmeichhe team enkawl hi ka inring ngai lo. Mahse ka enkawl takah chuan nuam ka ti a, an thiam lohte ka zirtir rualin kei pawhin thil tam tak ka hriat belh a ni. Kan champion hi team pumpui thawhrim rah a ni a, kan hun neih chhun kan hmang ṭha. Kawng engkima min thlawp tlattu Vakiria neitute chungah ka lawm takzet a ni," tiin Vanglaini a hrilh.

Vakiria FC coach Remruata hian I Day Football mipa inelnaah Chhinga Veng enkawl bawkin group B-ah hmahruaitu ni chungin semifinal a thlenpui. Kumin hian ADFA first division-ah a lungthu kim nan champion ngei tumin FC Bethlehem a enkawl a, tun hmain first division-ah Chhinga Veng leh Zo United a champion pui tawh a ni.



Share this Post

Login to comment
No Comments