Inelna ṭan hunah a danglam ang - Solskjaer

Manchester United leh Leeds United chuan vawiin tlai dar 4:30 hian Optus Stadium, Perth-ah friendly match an khel dawn. English club hi an inkhel tur aiin player lut leh chhuak chungchangin ngaihven a hlawh zawk.

United manager Ole Gunnar Solskjaer chuan, "League kan 

ṭan ang a, player zawng zawngin Manchester United tan an theihna sang berin an khel ang. Thu lengvak hi a tam ṭhin a, league ṭan hnuah erawh thuthang dah ṭhain team angin kan thawk ho ang," tiin inelna ṭan hunah boruak a danglam tur thu a sawi.

Red Devils hi Leicester City defender Harry Maguire nen sawi zawm an ni a, khawtlang media 

ṭhenkhat chuan pound maktaduai 80-in an lalut hman. Amaherawhchu he thuziah lai thlenga rintlak chin chu Foxes hian player an dawr loh ang thoin tumahin an player an dawr sak lo.

United hi Australia-ah training an nei mek a, defender laia chhawr theih paruk - Eric Bailly, Phil Jones, Chris Smalling, Marcos Rojo, Axel Tuanzebe leh Victor Lindelof te an awm. English club hian Maguire hi an lalut a nih chuan tu emaw hi an chhuah a ṭul dawn a, Lindelof erawh a nih a rinawm loh. Swedish defender Lindelof chuan, "United-ah hian ka hlim a, season thar tur atan theihtawp ka chhuah," tiin a ngheh thu a sawi.

Ole Gunnar Solskjaer hote hian an match hmasa berah Perth Glory chu 2-0 in an hneh a, hemi ṭuma inlan lo David De Gea, Eric Bailly, Victor Lindelof leh Romelu Lukaku te chu vawiina Leeds United an hmachhawn hunah an inlan ang. 

United hian Spanish keeper De Gea pawh contract pawhsei tir tumin an dawr mek. Hetihlai hian an striker Lukaku chu Inter Milan-in pound maktaduai 60-in an dawr leh dawn niin sawi a awm bawk

English club hian July 20-ah Inter Milan nen Singapore National Stadium-ah friendly match an nei leh dawn. Asia ramah hian Australia-a zin lo Matteo Darmian, Fred leh keeper Dean Henderson ten an zawm ang.



Share this Post

Login to comment
No Comments