Everton-in Fabian Delph lalut

Everton chuan Fabian Delph chu Manchester City 

aṭangin an lalut fel a, a man zat hi pound maktaduai 10 bawr vel a ni. Eng­land international midfielder hian season thum daih contract a ziak.

Kum 29 mi Delph hian Etihad Stadium-ah kum khat daih contract a la nei, mahse Pep Guardiola hnuaiah a khelhna hmun pangngai a chan phak mumal loh avangin khelmuala a luh tam theihna tur hmun a zawm.

Aston Villa player hlui hi ram tan vawi 20 a inlan tawh a, nikum khan World Cup-ah an ram aiawha a feh chhuah bakah UEFA Nations League Finals an thlen theih nana tha thawhtu zingah pawh a tel.

Delph chuan, "Season duh­awm tak ka hmang zo a, tun hnai kum li chhungin nomawi ka chawi nual, hlawhtling pawh ka inti hle. Mahse, inkhelh tam ka duh a, tunah Everton tana hun ṭha ka nei thei tur hi ka lawm hle," tiin a sawi.

Season hmasa Premier League pariatna Everton hian hmasawn an tum a, July thlatir khan Portuguese midfielder Andre Gomes pawh an lo lalut tawh. Delph pawh hian Switzerland-ah Marco Silva naute training a zawm nghal ang. Silva hian a player thar hi khelmual chhung bakah a pawn lama a tawnhriat an chhawr ṭangkai tur thu a lo sawi tawh a ni.



Share this Post

Login to comment
No Comments