Giroud-a'n Laurent Koscielny a chhan

Arsenal captain Laurent Koscielny-a'n club training a zawm duh lo a, season thar inbuatsaih nana US tour an neihah pawh a zin duh lo. Mi tam takin France international hlui hi an dem a, hetihlai hian Olivier Giroud erawhin a dinhmun a harsa tih a hriatthiampui thu a sawi.

Kum 33 mi Koscielny hian season khat dang Emirates Sta­dium-a cham turin contract a la nei mek. Mahse, a ngaihdan chuan a contract zawh dawn kumah hian a chhuak duh a nih chuan club dang nen an inbe theiah a ngai - an ram lama kir a duh a ni.

Ram leh club lama a khelhpui tawh Kos chungchang sawiin Giroud chuan, "Thil thleng leh a nihna tak kan hria a nih loh chuan thutlukna lo siam a, midang lo dem nghal vak hi a fuh ber lo. Kan hmuh loh leh hriat loh hian thil tam tak harsatna a awm a ni.

"Club leh mimal hian an tana ṭha ber turin thutlukna an siam chhuah ngei ka ring a ni," tiin a club hlui Arsenal leh a captain hlui ni bawk te chuan thu ṭha an neih a duhsak thu a sawi.

Koscielny hi khawvel defender 

ṭha zinga chhiar tel a ni ṭhin. Mahse, a ke artui hliam vangin France tan World Cup a khel thei lo a, a dam hnuah pawh ram tana khel tura koh a ni ta lo. Ram tana a hun a liam a, club lama a hun hunhnunga boruak ṭha lo a nei leh ta hian sawi a hlawh zual.



Share this Post

Login to comment
No Comments