Indonesia lamah Sindhu leh Srikanth

PV Sindhu leh Kidambi Sri­kanth te chuan nomawi chawi loa season an hman mek chu a hmawr bawk ṭhat an tum a, tunkar chhunga khelh tur Indonesia Open, BWF World Tour Super 1000-ah hlawhtlin tumin an feh chhuak.

Nikum December thla khan Sindhu hian World Tour Finals-ah title a la a, a hnu lamah a la champion leh lo. Tun season chhunga tournament paruk a khelh tawhah vawi hnih chiah semifinal a lut phak a ni.

Seeded pangana Sindhu hian a match hmasa berah chuan Japanese shuttler Aya Ohori a hmachhawn ang. Rio Olympic silver medalist chuan, "Season ropui tak chu a ni lo chiang a ni, a hmawr bawkna erawh a ṭhat hram ka beisei. Ka thawkrim a, hriselna a ṭhat bakah inrintawkna pawh ka nei," tiin beiseina a nei sang hle.

Mipa singles lamah Kidambi Srikanth chu hun eng emaw chen khup hliam vanga a inkhelh theih loh hnuah a inlan ve leh tawh dawn a, ani pawh hian Japanese player tho Kenta Nishimoto a hmachhawn dawn a ni.



Share this Post

Login to comment
No Comments