Champion England-in prime minister Theresa May an hmu

Cricket World Cup champion England chuan Thawhṭanni khan prime minister Theresa May chu a chenna 10 Downing Street, London-ah an tlawh. Infiammi tan chuan hlawhtlinna chan vanga ram hruaitu lu ber hmuh tluka hlu a awm chuang lo.

England hian 1979, 1987 leh 1992 khan World Cup final an lut tawh a, tun ṭuma New Zealand an hneh hi nomawi an chawi hmasak ber a ni. Cricket hmunpui Lord's-ah final hmuhnawm leh danglam bik pholan a ni a, hriatreng tlak World Cup chu han thlir let teh ang.

Asia hmachhuan India

Virat Kohli kaihhruai India chu league round-ah pakhatna an ni nachungin fak leh selna tur a awm tho. India hian an hmelma Pakistan an hneh a, nomawi chawi ta lo mah se he hnehna hi inhnemna tham a tling.

Chutihrualin infiamna khawvelah India rilru put hmang a dik tawk lo tia sawi a awm. Kohli hote hi Pakistan, Bangladesh leh Sri Lanka te beiseina fawng chelhtu an ni a, Men in Blue hian league round-ah England hneh se ram 

ṭhenawm pathum tan semifinal kawng a inhawng dawn. Amaherawhchu India an chak zo lo a, chak tumna tak tak an nei lo tiin mi tam takin Kohli hote an dem hial!

India hian player pawimawh Shikhar Dhawan leh Vijay Shankar te hliam vangin an chan a, chutichung chuan final lut ngei tura ngaih an ni tho. Hun pawimawhah India batsman-te an huaisen tawk lo a, New Zealand lakah top order an tluk sawp avangin final an thleng pha lo - captain Kohli pawh mawhphurhna hlen zo lo zinga mi a ni.

Hriatreng tlak final

Pathianni zana Cricket World Cup final chu a ropui bawk a ni ang. England captain hlui Michael Vaughan pawhin, "Cricket-a ka hun tawp ropui ber," tiin a khelh ve lohna inkhel chungchang 

a sawi.

New Zealand-in nomawi dawm tawha an inngaih laiin an thlauh leh a, final thil thleng kha 'Ta Se' tiin han thlirlet hmasa ila.

Trent Boult kha pen khat khan tawlh let lo se England hero Ben Stokes kha a thi dawn. Mahse England all rounder hi a thi ta lo a, six runs a ni thung.

Ball hmasa berah Jason Roy kha thi ta se 0/1 a ni nghal ang a, mipui phur tur pawh a vaw dai viau ang. Mahse England opener hi a him hlauh.

Stokes-a'n run hnih a siam tum tih hlawhtlin ngei tumin a 'dive' a, mak takin Martin Guptill ball vawm chuan Stokes-a bat perin boundary a thleng. Run hnih beisei England-in ball khatah run ruk an hlawh chhuak a, chak tawh lo turah inngai mah se beiseina 

a nung thar.

A tawpah champion zawn nan Super Over a ngai a, hetah pawh hian an la inhnehtawk tho. Team pahnih dai dantu chu final-a boundary ngah zawk a ni a, England an vannei ta zawk.

A na vawng vawng

New Zealand player Jimmy Neesham chuan, "Naupangte u infiamna khawvel hi luhchilh suh u. Ei siam lam emaw thil dang eng emaw ti ula. In ei thau ula, kum 60 mi niin hlim takin he khawvel hi inchhuahsan dawn nia," tiin twitter-ah a ziak.

Black Caps chak loh dan thlir chuan Neesham leh a ṭhiante tawrh dan tur a hriatthiam theih a, chutihrualin a tawng ve lo chuan a nat dan tur hi an hrethiam tak tak lo ang.

Man of the series leh Kiwis captain Kane Williamson chuan, "Final-ah khan chak lo an awm lo a, nomawi dawng tur zawk an siam mai a ni," tiin a sawi.

England-in boundary 26 an neih laiin Kiwis hian vawi 17 an nei thung. Hemi dan chungchang sawiin Williamson chuan, "He zawhna hi inzawh in inrin ka ring ngai lo. Keipawhin ka chhan a ngaih ka ring lo. Kan thawhrimna 

aṭanga thlir chuan dan pawm harsa deuh a ni," tiin a sawi.

An nui e

England captain Eoin Morgan chuan, "Kan tum ram kan thleng kha ka la awih thei lo. Ni danglam bik a ni a, khawvela cricket match hmuhnawm ber in thlir niin ka hria. Infiamnaah hi chuan inthlauhna hi tlemte chauh a ni a, tun ṭum hi chutiang zinga mi chu niin a vannei zawka kan ṭang hi ka lawm takzet," tiin a hlim thu a sawi.

Joe Root chuan, "Thil thleng kha khum theih a ni lo a, match awm tawh zawnga ropui ber a ni," tiin hnehna an chan dan a sawi a, England batsman thusawi hi hnialtu an awm a nih pawhin mi tlemte chauh an ni ang.



Share this Post

Login to comment
No Comments