Fak phu, fak hlawh lo Novak Djokovic

Wimbledon chu kumin bikah chuan hawn leh tawh loh tura khar a ni rih ta a, match zo tawh mah se ni 13 chhunga thil thleng ngaihnawm leh lungchhiat thlak tak takte kha theihnghilh a ni tawh dawn lo. Thuamhnaw, banner danglam leh thil dang hlu bik ṭhenkhat chu Wimbledon Lawn Tennis Museum lama seng luh a ni kumkhua tawh bawk ang.

Mizo upa ten 'Ar a lungchhia, Sanghar a lunglawm,' an tih ang deuhin lawm leh lawm lo an awm a, fans lamin an duh ber Roger Federer a champion zawh loh avangin an duhthusam Wimbledon chu a ni lo mai thei. Mahse, world number 1 Novak Djokovic ṭantute tan erawh hun hlu leh hlimawm chungchuang a ni thung si.

Wimbledon a zawh ruala tennis ngainatute titi tui ber chu Djokovic hian eng chen nge a thlen theih ang tih a ni. Player ropui Federer (20 titles) leh Rafael Nadal (18) te aiin Grand Slam nomawi a chawi hnem theih mai rinna a lian ta hle. Serbian tlangval hi vawi 16 a champion tawh avangin a khelh fuh season-ah chuan a khum thut thei dawn.

Fak hlawh lo

'Centre Court-a Federer nen in intawng a nih chuan mipui thlawpna ṭha hmuh inbeisei suh' tih hi tennis pleyer tam zawk ngaihdan a ni. Chutiang bawkin Paris khawpuia Court Philippe Chatrier-ah pawh Nadal chu fans lam ngainat rawn a ni.

July 14, Pathianni zan pawh khan British mipui ten 'Darling of Centre Court' an tih hial ṭhin Federer chuan ṭantu a ngah a, Swiss star a chet ṭhat laia thawm a rin ang bawkin a khingpui Djokovic a chet fuh loh deuh chuan a ring bawk.

Mahse, 'Roger, Roger, Roger' tia mipui au thawm kara 'Novak' tih ri hre theitu Djokovic-a'n darkar li leh minute 57 chhungin hnehna a chang. Wimbledon final rei bera chak zawk hi a rilru a paukhauh tih a chiang tawk a, a bik takin set hnuhnung ber an khelh laia championship point a pawt thla thei chuan a chiai loh zia a finfiah.

Chhantu Becker

Wimbledon vawi thum champion tawh, tun hma lama Djokovic coach ni ṭhin Boris Becker chuan, "Set ngana an khelh lai phei kha chuan fans lamin Roger an duhsak tih nasa takin a lang a, ani hi helai hmuna ropui ber a nih avangin khatiang taka ṭan a hlawh pawh kha a mak lo.

"Mahse, a khingpui kha vawi li champion tawh Novak a ni a, tunah phei chuan vawi nga a champion ta. Fans lamin Roger leh Rafa chunga zahna leh duhsakna an lantir ang hi ani pawhin a phu hlein ka hria, season lehpekah chuan boruak a danglam tawh ka beisei," tiin a player enkawl ṭhin a chhan na hle.

Final hmuhnawm taka Federer-a'n tihsual ennawn tura a dil (challenge) ṭhum a, endikna khawl (Hawk-Eye) hman chungchangah Djokovic hi chair umpire Damian Steiner bulah a va kal a, hetih lai hian fans lamin an 'boo' hial - tennis hi game zahawm leh puitling a nih avangin fans lamin player an au el hi a thleng tam lo hle.

Tuihal a la reh lo

'Sum ngah a piangin an duh belh, duhkhawp a neih theih chuang lo,' tih ang tho khan. Grand Slam pawh a champion hnem apiangin a dang an duh belh a, a ngah ber nih tumin an inum zel. Ṭhangthar ten champion hnem ber tia an sawi nih châkin player ropui pathum - Federer, Nadal leh Djokovic te an inel zel dawn.

German tennis player ropui Becker chuan, "Novak hi a la hlim tawk lo, major title 16 a lak tawh hi tam viau mah se a chungah pahnih an la awm. Anni pahnih hi a khum hunah a hlim famkim chauh ang," tiin Serbian tlangval chu midang chunga lenga ropui ber nih châk mi a nih thu a sawi.

Swiss star Federer hi kumin August thlaah chuan kum 38 a tling tawh dawn a, Nadal pawh kum 33 mi a ni tawh. Djokovic hi kum 32 mi a la ni a, tun dinhmunah nomawi hlu bik chawi hnem lamah hniam ber rih mah se, a theihna san zia leh rilru paukhauhna thlir chuan atan Grand Slam champion hnem ber nih theihna kawng a inhawng.



Share this Post

Login to comment
No Comments