Palian pathumin quarterfinal an lut

Roger Federer, Novak Djokovic leh Rafael Nadal te chuan harsa lo takin Wimbledon 2019 quarterfinal an lut vek a, tennis player ropui pathum hian zaninah inelna an hmachhawn chhunzawm leh ang.

Anni pathum hian Grand Slam nomawi an chawi tawh belhkhawm chu 53 zet a ni a, tun ṭumah hian midang tan an kian ve tawh dawn nge an hui leh dawn tih chu hun rei lote chhunga hriat a ni dawn - player dang tan nek chhuah harsa tak turin an la ṭha tawk vek.

Number 1

Thawhṭanni zan khan world number 1 Novak Djokovic-a'n Ugo Humbert chu 6-3, 6-2, 6-3 in a hneh a, Serbian tlangval hian major tournament-ah quarterfinal vawi 45 a invuak kaina niin, All England Club bikah erawh vawi 11 a luhna a ni.

Grand Slam vawi 15 champion tawh hian Humbert-a service chu hma taka chhuhsak zelin harsa lo takin hnehna a chang thei, France tlangval paltlang tur hian darkar khat leh minute 42 bak hun a mamawh lo. Ama service bikah phei chuan point 14 bak a paih lo - a match lehpekah David Goffin nen an inkhel ang.

Seeded pakhatna Djokovic chuan, "Grand Slam hi kan tan chuan khawvela infiamna lian ber a ni a, chuvangin final luh ngei hi ka thil tum hmasa a ni ṭhin. Ugo nen hian kan la inhmachhawn ngai lo, mahse nikum US Open leh kumin French Open-ah a inkhel ka hmu, tun inelnah pawh player ṭha tak tak a hneh theih avangin a inkhel ka zir uluk hle," tiin a sawi.

Roger hlau ru

Kum 37 mi a ni tawh a, a rualpui ten tennis an chawlhsan zo tawh. Mahse, Roger Federer erawh khawvela a ṭha berte zinga mi a la ni reng. Swiss star hian darkar khat leh minute 14 chhung lekin Matteo Berrettini chu 6-1, 6-2, 6-2 in a hneh. A hmachhawn leh tur Kei Nishikori erawh a tawh a khirh deuh tura ngaih a ni.

Federer chuan, "Set nga khelh hi a ropuiin a hmuhnawm a, mahse ka taksa dinhmun ngaihtuah chuan khelh loh a ṭha zawk. A rei lo thei ang ber court chhunga awm hi round sang zawk thlen nan chuan a ṭha zawk a ni," tiin a sawi. Tun inelnaah a match hmasa bera set li a khelh bak chu straight set-in hnehna a la chang vek.

Quarterfinal-a Federer khingpui tur Kei Nishikori hi seeded pariatna chang phak a ni a, Japanese tlangval hian inkhel dangah Mikhail Kukushkin chu 6-3, 3-6, 6-3, 6-4 in a lo hneh ve bawk. Nishikori hian All England Club bika Federer-a'n a vawi 100 nana chak a tumna chu a dang thei dawn em tih chu en chakawm tak a ni.

Nadal a tluang

Roger Federer leh Novak Djokovic te champion tura rinkai an ni a, seeded pathumna Rafael Nadal pawh sawi hmaih theih a ni bik lo. Spanish tlangval hian Joao Sousa chu 6-2, 6-2, 6-2 in a hneh a, a service a hloh lo ni mai loin break point pawh a hmuh tir miah lo hial a ni.

Season hmasa khan Nadal hian semifinal a lut a, inkhel inhnehtawk takah Djokovic a ngam lo. 2011-a final a khelh hnuah kumin hi last 16 a paltlang lehna hmasa ber a ni a, vawi hnih a champion tawhna hmunah hian semifinal luh a duh a nih chuan Sam Querry a paltlang a ngai ang.

Grand Slam vawi 18 champion tawh Nadal chuan, "Inkhel nuam leh hlimawm tak a ni, ka match hmasa lamah khan ka service hnuhnung a ṭha tawk lo, tunah erawh a rintlak tawh hle. Hliam nei loa ṭha taka ka khelh theih avangin a nuam ka ti takzet," a ti.



Share this Post

Login to comment
No Comments