Cricket leh Mizote

Vai vawm tia kan lo sawi fiam ṭhin 'Cricket' chu India rama awm kan nih miau avangin a tak ramah cheng vein Zofate tana infiamna khawvela hming chher theihna leh ei hmuhna a lo ni ta der mai. Mizorama cricket zinkawng hi ngaihnawm tham ve tak a ni.

CAM

Cricket Association of Mizoram (CAM) hi kum 1992 daih tawh khan din a ni ve tawh a. Amaherawhchu infiammna dang anga lar lutuk a nih loh avangin a tirah chuan mi hriat pawh a hlawh lem lo. Bul ṭantirh lamah chuan hnam dang sipaite leh tualchhung a tui tlem a zawngten Lammualah te intihhlimnan an khel ve leu leu ṭhin.

Hun leh ni a lo inher zel a, CAM hruaitute hmalakna zarah leh Sachin Tendulkar zunzam rawn thleng phain a game tui an pung ve zel a. Club-te indin chhoin Central YMA Sports-a tel a nih aṭang phei chuan mi hmelhriat a hlawh ta zel a, tun dinhmunah chuan division thum lai a lo awm ve der tawh mai. Tlawmngai pawl kan tih YMA hi chhiatni leh ṭhatni bakah Mizoram infiamna tan hian an va hlu tehlul em.

Tichuan, hruaitu inpete hmalakna a zarah kum 15 liam ta khan Sihhmuiah International size cricket khelmual chu sual chhuah a lo ni ta reng mai. Tun season liam ta khan, National Under 16 game hnih thleng thei hialin a lo puitling ve tawh a ni.

Tunah hian he Suaka Memorial Cricket Stadium hi BCCI-in a aia level sang zawk thleng thei turin sum tam tak sengin a chei ṭha mek a, engtik niah emaw chuan IPL te, International match etc kan kawtkaia ngei hian kan la thleng ve ang tih hi rinna mitin kan thlir reng ta mai.

Intihlimna aṭanga Professional

Hun rei tak chhung chu CAM hian BCCI ah affiliation a lo dil ṭhin a, mahse India rama association ropui ber leh khawvela sports body hausa ber hi duh anga awlsama luh mai theih a ni hauh lo. Criteria leh norms a tam em em a. Zep thu a awm lo e, kan resource leh a inkhel zatte, kan sum neih leh kan tuipuinain a la tlin lo a ni ber. 

India rama cricket lar zia leh pui ziate chu kan hre ṭheuh ang a, hmun dang thlir chuan Mizoram chu hnufual tak kan ni. Tun hma zawngin kan hruaitute hmalakna a zarah Silchar velah Mizoram team an lo tir ve tawh ṭhin a, kan state aiawh ve meuh kha Assam District team pakhat pawh hian an lo sawp hrep zel mai chu a ni.

Chan loh khanah

India rama mi thiltithei ber chu Prime Minister a ni a, a dawttu chu BCCI President an lo tihial ṭhin. BCCI hruaitu nih inhruipawhna nasa lutuk avang te, politics inrawlh thuk lutuk avang te leh corruption nasat lutuk avangin kum 2014 khan Supreme Court chuan BCCI chu a hling ta chat mai a, khang hunlai a hruaitute chu chawlhtir vekin, thawm ṭhat hna a thawk ta.

Chutah chuan Supreme Court lam chuan BCCI kawng dika hruai tur leh siamṭha turin Panel a siam ta a, Justice retired Rajendra Mal Lodha-a chairman-na hnuaiah Lodha Panel chu a lo ding ta. Nikum 2018 aṭang khan an thu chhuak chu zawm a lo ni ta a ni.

He Lodha Panel hian, BCCI-in hmarchhak state a lo en kan dan te chu hmuchhuakin, Delhi leh Mumbai ho nena inanghkhat vek turin a rin lut ta a. Mizoram pawh nikum 2018-19 season aṭang khan first class cricket leh age category hrang hrangah a tel ve ta a nih chu.

Lodha Panel hian BCCI inthlanṭhat a nih hma chuan,a enkawl turin hruaitu lailawk tur a ruat a, chung mite chu COA tiin, Comptroller and Auditor General of India hlui Vinod Rai-a chairman-na hnuaiah vawiin thleng hian a la kal ta a ni.

BCCI leh a hnuai State Association-te chu an inher dik ṭan tih a hriat tak avangin, kumin September thla hian State Association zawng zawng inthlan ṭhat tur a lo ni ta a, chumi zawh October thlaah BCCI inthlanpui a awm bawk ang.

Lodha Panel thu chhuak

1. Kum 70 chung lam tan hruaitu a nih theih loh.

2. Politician, sorkar hnathawk etc dinhmun chelhte hruaitu a nih theih loh.

3. Term khat hi kum thum niin, term thum aia tam hruaitu a nih theih lo a, term hnih a zawna hruaitu ni an awm chuan, a dawt leh term thumnaah a chawl anga (cooling off), chuan hruaitu a nih leh dawn chuan, a dawt leha a tawpna atan term khat an ni leh thei ang.

Zofate tan kawl a eng ta

India rama infiamna lar ber leh sum tamna ber cricket-a thuneitu sang ber BCCI-ah Cricket Association of Mizoram a luh ve tak hlawl siah chuan, professional cricket anga kal a lo ngai ta a. Ei hmuhna tlak leh India rama kan inphochhuana rahbi a lo ni dawn ta a ni.

Age category hrang hrang leh hmeichhe team thlengin tel a lo ngai ta a, tin hemi ken tel thil tam tak a awm bawk.

Hlawh

Sawi tawh angin tun lai khawvelah chuan hlawh hi tehfung pawimawh ber a lo ni ta a, hlawh hi BCCI-in player-te bank account-ah a thun vek a ni.

A level hniam ber Under 16 mipa hi in thlir teh ang. Under 16 te hian 3 day match an tih chauh hi an khel a. Ni khatah Rs 3,500 hlawhin. Game khat khelah player pakhatin Rs 10,500 zel a hlawh dawn a nih chu. Chuan league a nih angin, thla thum chhung velin kan Mizo rawlthar kum 16 hnuai lam state tana khel te hian cheng singli, sinngnga vel anlo lalut der ta mai.

Hmeichhe Senior: Hmeichhe team-te hian ni khatah Rs 12,500 an hlawh a, season khatah cheng nuai hnih, thum vel an lalut ve ta der bawk.

Mipa First Class Cricket: Mipa Senior team te hian ni khatah Rs 35,000 an hlawh a. Season khatah cheng nuai sawm chuang an lalut ta der a. Heng lo pawh hi age group hrang hrang mipa leh hmeichhiaah a la awm bawk.

Team tinah manager, coach, physio, trainer etc an awm a ngai a, heng ho hi BCCI lamin kum khatah nuai sawm, sawmhnih vela a rawih te a ni hlawm. Tun dinhmunah chuan physio leh coach ṭhenkhat chauh hi Zofaten kan la qualify a ni. 

Tin a inkhel mai ni lo - umpire, ground curator, media etc lamah hian ei hmuhna tlak khawp hlawh an dawng a, hemi a zuanglut tur pawn zofate tan kawng a inhawng ta zel a ni.

Chutihrualin cricket-ah hian ground phuisui tak neih ringawt hi a tawk lo a, senior level-ah phei chuan 5 star hotel level a thlentir vek an ni a. Tin, thlawhtheihnaa hmanga zin vek a nih avang hian sorkar leh sumdawng mi a ngaihna hriaten hma an lak zel te pawh a ngai ang.

Mizoram hi kan facilities neih te leh hotel standard-ten a la zir loh avangin tun season liam ta khan Mizoram team-in kan ramah home match kan khel thei lo a, BCCI chuan Mizoram team hi state dang nghelnghet zawkte a mikhualtir tawp a ni.

Suangtuahna ram

Tun dinhmunah chuan CAM-in cricket kaihhnawih thilah chuan BCCI thlazar hnuaiah chak takin hma a sawn zel a, hmalam kan pan zel chuan kan beisei ngam loh hi kan la thleng thei ang.

Engtik niah emaw chuan IPL team scoresheet-ah Sailo, Ralte, Hauhnar etc tih la chuang turte, India World Cup Squad-ah Khiangte, Hmar, Fanai etc la inchhu kalh tur hi, rinna mitin kan thlir a. Kan ban phakah a awm ve takah chuan thawhrimna kan thlen thuai hi ka beisei tlat a ni.



Share this Post

Login to comment
No Comments