CYMA Football Ngaihven hlawh chin Last 16 kan thleng ta

Suzuki Gixxer SF 250 20th Inter Branch YMA Football Tournament-ah team tel an tam ṭhin avangin round hmasa ber aṭanga chik vek seng a ni lo a, khelmual pakhat aia tam hman a nih ṭhin avangin tualchhung football ruhkawl tan pawh en vek theih a ni lo.

Tunah chuan a thiam 16 chauh an dam tawh a, Mizoram football hmunpui tiha sawi ngam Lammual-ah inelna suan luh vek a ni ta bawk. Zonet leh LPS ten CYMA Football hi live-in an pe chhuak dawn a, football khawmpui lian hi Zonet-in YouTube channel thlenga an pek dawn avangin khawvel hmun kil tin aṭangin a thlir theih dawn tihna a ni.

Vawiin chhun dar 12:00 hian match hmasa berah 2005 champion Republic Veng leh Lungchhuan an inkhel dawn a, chawhnu dar 2:00-ah 2006 champion Lengpui leh Hnahthial Joint YMA te an inkhel leh ang.

Tie Draw chu...

Thawhṭanni khan Third Round khelh zawh a ni a, hemi zan vek hian CYMA Hall, Tuikhuahtlangah tie draw neih nghal a ni. Seeded team an awm hran tawh lo a, a thiam 16 zinga tel thei Branch 16 chu intluk tlang vek a, tute pawh an intum thei vek.

Vawi nga champion tawh Armed Veng chu kumin NECS Cup final-a an hmachhawn Republic Veng nen quarterfinal-a inhmachhawn thei tura pawh an ni a, la champion lo zinga team ṭha pahnih Bawngkawn leh Bethlehem Vengthlang te chu Last 16-ah an inhmachhawn nghal dawn. Heng veng lian pali zingah hian Red Ribbon Football champion tawh Durtlang an la tel bawk a, final kalkawng a khirh hle.

Final luh inchuh tur team riat lehlam zawkah Lengpui chiah CYMA Football-a champion tawh an awm a, chutirhualin Red Ribbon Football-a champion tawh leh inelna hnuhnung ber finalist Chanmari dah hniam theih an ni lo. Aizawl khawpawn aṭanga seeded ni pha Hnahthial Joint leh Khawzawl Joint te zuam chi an ni lo a, Salem Veng, Ramhlun North leh ITI Veng te pawh an khelh fuh niah chuan team ṭha zawk hneh thei tur an ni.

Quarterfinal chinah Aizawl khaw pawn pakhat chu an la awm dawn chiang a; pahnih awm tur chuan Lungchhuan, Zawlnuam Bawrai, Phulpui leh Khawzawl Joint ten 'upset' an thlentir a ṭul ang.

Republic Veng Vs Lungchhuan

Republic Vengin last 16 lut turin Saipum (8-0) leh Ramhlun Vengthar (6-0) ten an hneh a, match tinah goal sarih zel khung ang niin goal an la chhuah lo. Captain F. Larinpuia chu an player hriat hlawh ber a ni a, scoresheet aṭang chuan match hniha hattrick la siam ve ve Lalhriatpuia chu hming langsar ber a ni.

Lungchhuan hian Zemabawk (3-2), Muthi (3-2) leh Hualngohmun (1-1, 4-3 pen) ten an hneh a, last 16 thleng tur hian seeded team Hualngohmun an hneh tel avangin vannei ringawt chu a ni bik lo. Lungchhuan goal sarih hi player paliin an khung a, goal thum khung tawh Lalfamkima a pawimawh ṭhin hle.

Republic Veng manager Lalchhantluanga chuan, "Veng leh veng inelna kan ngaihlu a, Republic Veng-in football hma a sawn theih nan YMA leh RGSA ten nasa takin hma a la a. Vengchhung section tournament rah a rawn lang chho a, kum li nga kaltaa kan YMA Chhanga thiam pawlte player pawimawh an rawn nichho hi kan lawm hle," tiin Vanglaini a hrilh a, Lungchhuan hneh theih a inbeisei thu a sawi tel bawk.

Lungchhuan captain Lalmuanzuala  chuan, "CYMA Football-ah kan vawi khat telna a ni a, experience kan nei ṭha lo nachungin kan huphurh bik lo. Republic Veng hi hneh ngei kan tum," tiin a sawi a, MPL player Vanlalzuia Hnamte te an kawl avangin an inringtawk hi a mak lo.

Hnahthial Vs Lengpui

Tlai dar 2:00-a Hnahthial leh Lengpui inkhel tur hi intum tawk tura ngaih an ni a, team ṭha ve ve an ni. Kumin NECS Cup-ah Lengpui hi semifinal-ah an vanduai a, tun ṭum hi an player chhuanvawr Rohmingthanga tana tournament hnuhnung ber a nih tawh dawn avangin nomawi nena thlah an duh ang.

CYMA Football hnuhnung berah khan Rohminga ṭhianpa Samson Ramengmawia chu Ramhlun South-in nomawi nen an thlah tawh a, Lengpui tihmingṭhatu 'Pa Roa' beiseina hi Jeje Lakpekhlua te khua Hnahthial-in tihtawp sak an tum dawn. Lengpui hian last 16 thleng turin Kawnpui Vengthar (2-1) leh Sihphir (4-0) an hneh a, Hnahthial Joint YMA hian Tlungvel Venghlun (6-3) leh Venghlui (3-2) in an hneh.

Lengpui player pawimawh Rohmingthanga chuan, "MPL awm hma khan Red Ribbon Football-ah Hnahthial hi kan hneh tawh lo a, amaherawhchu khami ṭuma Lengpui team leh tun ṭum hi chu a dang tawh. Player chhuak thar ṭha tak tak kan nei a, kan ṭha zawk turah kan ngai," tiin hnehna chan a inbeisei thu Vanglaini a hrilh.

Hnahthial manager C. Lalramdinsanga chuan, "Kum sarih liam ta khan ka manager-na hnuaiah Lengpui hi kan hneh tawh a, tun ṭumah pawh hneh leh ngei kan tum," tiin a sawi. An inbuatsaih dan sawi zuiin RD-a chua,n "Joint YMA Hnahthial team hian sum nei loin bul kan ṭan a, kan kalna tur thlengin harsatna kan tawk. Amaherawhchu mi inpe te an awm zel a, Lalpan thil ropui min tihsak a, ei leh in tur leh thlennaah buaina kan nei lo. Min thlengtu Republic Veng Branch YMA chungah lawmthu kan sawi tak meuh meuh a ni," tiin Vanglaini a hrilh.

Lengpui leh Hnahthialah hian tualchhung chauh ni loin Mizoram pawna khel chhuak player an awm nual. Last 16 intum tawk tur ber zinga ngaih an ni a, football hmuhnawm an pho chhuak thei ang.



Share this Post

Login to comment
No Comments