Season ka hmang ṭha lo - Coutinho

Barcelona chhuahsan tur anga sawi Philippe Coutinho chuan Catalan club-ah season ṭha tak a hman loh thu a pha lo.

Kum 26 mi attacking midfielder chuan, "Season ṭha tak ka hmang lo tih ka hria a, ka beisei angin ka khel chhuak bik lo. A ṭha thei ang bera khel leh tur chuan a pawimawh ber chu thawhrim a ni a, ka thawkrim em em a ni," a ti. 

Coutinho hian January 2018 khan Barcelona hi a zawm a, pound maktaduai 142 man niin Barca player manto ber a ni. Nou Camp-a a season hmasa berah hian match 22 khelin goal 10 a khung nghal a, La Liga leh Copa del Rey-ah an champion. 

Season hman zawh takah erawh match 53-ah goal 11 chiah a khung a, La Liga nomawi an chawi chungin Champions League-ah Liverpool laka an mualpho avangin dem a hlawh. 

Mahse, Brazil tana a khelhpui Thiago Silva chuan Coutinho hi chhanin, "Coutinho hian Barca-ah season harsa tak a hmang a, an auh el mai bakah beiseina a sang em em a ni.

"Brazil-ah erawh kan team khaipa ber a ni a, a bik takin Neymar a awm loh chuan kan mamawh lehzual. Friendly match pahnih kan khelh takah pawh khan team innghahna a ni," a ti. 

Brazil hian an friendly match hnuhnung pahnihah goal 10 (Qatar 2-0; Honduras 7-0) an khung a, Coutinho chu player pawimawh a ni - Inrinni hian Copa America-a an match hmasa berah Bolivia an hmachhawn ang. 



Share this Post

Login to comment
No Comments