Golden State Warriors damna point 1 Toronto Raptors game mamawh zat 1

NBA champion tur a la chiang lo. Nimin zing khan Golden State Warriors chuan Toronto Raptors 106-105 in an hneh hram a, nomawi an thlauh lek lek tawh chu an la dawm ding rih hram.

Golden State chakna zat hi point khat chauh ni mah se beiseina siamtu a ni a, chak lo ni se title an hloh ang. Raptors tan pawh beisei a la sang hle; a vawi khat nana NBA champion ni turin game khat bak an mamawh tawh lo. 

June 14, Zirtawpni zing hian Oakland-ah game 6 khelh a ni ang. Game 7 khelh a ngai a nih chuan June 17, Thawhṭanni khian Toronto lamah a ni thung ang.

Point khat chauh

Scotiabank Arena-ah Toronto Raptors lamin series 3-1 a hmahruai chungin Golden State Warriors an mikhual a, hun tam zawkah a hniam zawk ni mah se quarter hnuhnung berah che fuhin nomawi chawi thei dinhmunah an ding.

An dinhmun a inthlak hnu, a hniam zawka an awm leh lai pawhin Raptors lam hian hun ṭha an la nei tho. Hun tawp nan second 15 chauh a awm tawh a, 106-105 in hniam zawk mah se an ball chan lai a nih avangin 3 points emaw, 2 points neih belh thei an la ni - a chhe berah free throw hlawhchhuah theih an ni cheu bawk.

Nick Nurse-a naute an phur a, court chhunga inkhel entu mai bakah Toronto khawpui hmun hrang hranga a huhoa inkhel entute chu champion lawmin an sahawk hman. Kum 1995 a din chauh team hian NBA Finals an vawi khat khelhnaah team ṭha zawka ngaih an hneh ngei dawn niin a lang hman.

Mahse, 2 point emaw free throw hlawhchhuah duhtawk mai loin 3 points neih an tum, second hnuhnung ber a rik rualin court sir aṭangin Kyle Lowry-a'n 3 points a shot a, tawnhriat ngah Draymond Green-a'n a lo tihbuai hman avangin a hlah - khualmualah point khat chauhin Warriors an chak!

Durant a hliam!

NBA playoff game vawi kua ngawt chawn hliam vanga a inlan theih loh hnuah Kevin Durant a inlan leh thei tawh a, Golden State tan thlamuanpui tham a nih rualin Raptors tan erawh mangchhia thlen thei tur player a ni thung.

American player Durant-a'n inkhel 

ṭantir lamah hna a thawk ṭha nghal, minute 12 chhunga point 12 neihpuiin a team hi hma a hruaipui. Quarter khatna bikah 34-28 in an chungnung. Mahse, quarter hnihna tir lamah a ke artui hliam vangin lakchhuah a ngai a, a khel zui thei tawh lo.

NBA Finals vawi hniha Most Valuable Player atana thlan tawh Durant hi engtia rei nge a chawlh dawn hriat a la ni lo a, nimin khan endik zui nghal niin he thu buatsaih lai hian a chawlh chen tur a la hriat loh - game 6 chu a khelh theih a beiseiawm loh.

Warriors general manager Bob Myers chuan, "Kevin Durant hliam chungchangah tumah dem tur an awm lo. Damkawr mai a la ni tih chu kan hriat vek a ni a, mahse team in a mamawh chuan court chhungah a theihtawp a chhuah ṭhin. Enkawltu ṭha tak a nei a, MRI scan resut a zirin a tana ṭha thei ang bera enkawl a ni ang," a ti.

Curry leh Thompson

Golden State Warriors tan Stephen Curry pawimawhna inhrilh nawn a ngai lo. American point guard hian point 31 a nei a, a point neih zinga 3 points vawi khat chu hun tawp dawna a luh a ni, dinhmun hniam zawka an din laia an thawh chhuahna a nih avangin a pawimawh hle.

NBA MVP vawi hnih ni tawh tluk zeta pawimawh chu Klay Thompson a ni. Hun tawp nan minute khat pawh a awm tlin tawh lohah Thompson hian 3 points a nei a, an khingpui Raptors an tlan pelhna point a ni - Curry leh Thompson ten hun tawp boruak san vanglaia point an nei thei hi GSW thawhchhuah chhan langsar a ni.

Warriors coach Steve Kerr chuan, "Ka naute ka lawmpui, hnehna chan phu khawpin an khel chhuak a ni. Chutih rualin Kevin chunga thil thleng erawh a pawi ka ti hle, a dam leh thuai ka duhsak takzet a ni.

"NBA Finals a la zo lo a, tun ṭuma an khelh ang bawk hian Curry leh Thompson an khelh chhunzawm ka beisei. Anni hi chu hla tak aṭang pawha point nei thei an ni a, hun harsa kan tawh lai pawha min khaiding ṭhintu an ni," tiin American player pahnih a fak hle.

Beiseina a tawp?

Kum 1947 aṭanga NBA Finals khelh tawhah hian 3-1 a hniam hnuah team pakhat chiah an la tho chhuak thei, 2016 khan LeBron James awmna Cleveland Cavaliers chuan Warriors an lehthal a ni. Kumin game 5-ah thil mak a thleng a nih ngawt loh chuan Raptors kha champion tura rinkai an ni hman.

Game 5-ah team pahnih an inkhel tawk a, quarter thumna a zawh thleng pawhin Warriors san zawkna chu quarter hmasa bera an san zawkna point ruk chauh a ni. Minute thum chauh khelh hmabak neih tawhah Kawhi Leonard-a'n point 26 a neih zinga pawimawh bik ni turin, a zawnin 3-points vawi hnih a lut.

Leonard thiltih avang hian 103-79 in hma an hruai fal a, game 4 ang bawkin hun tawp dawna an chet fuhna chuan ropuina ram a hruai thleng teuh hle. Nomawi an chawi lohna hi hun tawp dawna point 2 an neih belh loh vang chauh a ni.

Raptors head coach Nick Nurse chuan, "Tun ang hun, player an thiam em em tawhna khawvelah chuan hun tawp hma minute thum chauh awm tawha point ruka hmahruai hi a tawk zo lo. Thil thlen dan kha ka hrethiam, ka nauten zir belh tur an la nei a ni. Dinhmun ṭha zawk angin lang mah ila pressure kan nei ve tho a, match hmasa lam angin khualmualah hnehna chan kan tum ang," a ti. 



Share this Post

Login to comment
No Comments