Hero Intercontinental Cup India nena inkhel hmasa ber tur Tajikistan

All India Football Federa­tion (AIFF) huaihawta neih tur Hero Intercontinental Cup atan nimin khan fixture tihchhuah a ni a, India leh Tajikistan ten match hmasa ber an khel ang. 

Inelna hi July 7 aṭanga khelh ṭan tur a ni a, July 19-ah final khelh tura ruahmanna siam a ni. Inelna thlengtu India bakah hian Tajikistan, Syria leh North Korea te chuan he inelna hi an hmachhawn dawn. 

Kum 2018 khan a vawi khat nan Intercontinental Cup hi khelh a lo ni tawh a, India hian Kenya, New Zealand leh Chinese Taipei-te chu he inelnaa inlan tur hian a sawm. 

Stephen Constantine enkawlna hnuaiah India an champion a, final-ah hian African team ṭha Kenya chu 2-0 in an hneh. Indian football fan-ten nikum lawka an sulhnu hi chhunzawm leh an beisei ang.

Khawiah nge?

Intercontinental Cup hi nikum ang thoin khawpui pakhatah nghah a ni dawn a, Ahmedabad chuan he inelna hi a thleng dawn - match zawng zawng he khawpuiah hian khelh vek a ni ang. 

Inelna hi The Arena-ah khelh a ni dawn a, he stadium hi October 2016-ah khan hawn a ni ve chauh a, Gujarat sorkar leh SE TransStadia ṭangkawpin khawvel stadium dangte el pha turin an din. 

Dollar maktaduai 82.15 senga sak he stadium hi India rama khelmual ṭha ber pawl a ni a, football khelhna bikah hian mi 20,000 an leng. Nikum khan StadiumDB.com chuan Stadium of the Year dawng thei tura a chhawpchhuah zingah a tel a, India stadium zinga lang hmasa ber a ni. 

Ahmedabad khawpuia sta­dium hian 2016 Kabaddi World Cup, 2017 Pro Kabaddi leh 2017-18 Santosh Trophy te kha a lo thleng tawh a, Intercontinental Cup a thleng leh dawn ta. 

Inlan tur

Intercontinental Cup-a inlan tur team pali zingah Syria chu FIFA ranking-a sang ber a ni a, 83-na an ni. India hi 101-na an ni a, Tajikistan (120) leh North Korea (121) ten an dawt. 

Syria player-te hi middle east club-a inkhel deuh vek an nih avangin an chhelo ang tih a chiang a, Aizawl FC midfielder  Mahmoud Al Amna kha a vanglaia Syria tana match 50 chuang inlan thei a ni a, Mizo club a rawn pan khan a chuai tawh lam a ni - a thiamzia lah kan hai lo. 

North Korean player zingah an ram club-a khel an tam zawk a, Japanese leh Italian club-a khel an kawl nual bawk avangin team ṭha tia sawi ngam an ni. 

Team nem ber tura ngaih Tajikistan pawhin ram pawn club-a khel thei player an neih nual avangin zuam ngawt chi an nih a rinawm lo a, Intercontinental Cup a hmuhnawm dawn. 

Inelna kalphung

Intercontinental Cup-a inlan team palite hi an intum kual vek dawn a, a tawpah a sang pahnihin final an khel dawn - semifinal a awm hran dawn lo tihna a ni a, pathumna inchuh pawh a awm lo ang. 

Point hmuh zat inangah goal difference ṭha zawk chu teh nana hman tur a ni a, goal difference-ah pawh an la intluk cheu chuan head-to-head result chu en tur a ni. 

India-in a nem ber tura ngaih Tajikistan an hmachhawn nghal dawn avangin an vannei a, North Korea leh Syria an hmachhawn chhunzawm lehnghal ang - match hmasa bera an result hian an dinhmun a hril thui hlein a rinawm. 

League match hi July 16 thleng khelh tur a ni a, ni khatah match khat zel khelh a ni ang a, July 19-ah league round-a a sang pahnihin champion nih an inchuh ang. 

Lianzuala telna

India coach Igor Stimac chuan nimin khan Intercontinental Cup atan probable squad a puang a, player 35 koh zingah King's Cup-a inlan zo hlim Lallianzuala Chhangte chu a tel. 

Blue Tigers hian June 25 aṭangin camp an nei ṭan ang a, Mumbai Football Arena-ah training neiin player te hi an la chhawk ṭhen leh dawn a ni - Lianzuala hi Mizo awmchhun a ni. 

Jeje Lalpekhlua chu hliam vangin King's Cup-ah a inlan tawh lo a, Ahmedabad-a inelna hmachhawn tur pawh hian koh zingah telh a la ni rih lo. 

Hetihlai hian Stimac hnuaia a vawi khat nan defender pahnih Sarthak Golui leh Narender Gehlot, midfielder Mandar Rao Desai, Ashique Kuruniyan leh Nikhil Poojary te chu squad-ah hian koh an ni bawk. 

Anas a lo kir

Asian Cup khelh zawh ruala international football a chawlhsan thu puangtu central defender Anas Edathodika chu India squad-ah telh a ni a, Stimac nen an inbiak vang a nih thu a sawi. 

Anas chuan, "Coach-in message min rawn thawn a, a squad zawm tura min duh thu min hrilh. A tirah chuan mak ka ti a, mahse assistant coach  Venkatesh Shanmugam-a'n min rawn be leh a, camp zawm hlan ka nghakhlel tawh hle a ni," a ti. 

Kum 32 mi Anas hi Indian defender ṭha ber pawl ni mah se 2017 khan ram tana a match hmasa ber a khel ṭan ve chauh a, Asian Cup zawha ram tana inkhelh a chawlhsan thu a puan khan match 19 chiah a khel hman. 

Tlarhnung laia Sandesh Jhingan nena an inkawp chu Indian defender inkawp ṭha ber pawl ang hiala sawi an ni a, an pahnih hian season khata vaibelchhe khat hlawh phak player tlemte zingah an tel. 



Share this Post

Login to comment
No Comments