NBA vawi li champion Parker a chawl

Basketball inelna sang leh ngaihhlut ber NBA champion vawi li ni tawh Tony Parker chuan a infiamna ngainat ber a chawlhsan thu a sawi a, San Antonio Spurs player ropui hi kum 37 mi a ni.

French point guard Parker hian 2001 khan San Antonio Spurs hi a zawm a, a club tan hian player pawimawh ni chhoin 2003, 2005, 2007 leh 2014 te khan NBA champion a nih pui - season hmasa erawh kha chuan Charlotte Hornets tan a khel.

Kum 2007-a an champion ṭum phei hi chuan NBA Finals bika player khel ṭha leh pawimawh ber - Most Valuable Player atan thlan a ni. Tunah chuan a vanglai a liam tawh a, season hmasa khan match 56 khel ve bawk mah se a bul ṭantu player panga zingah vawi khat mah a tel ta lo a ni.

An ram hi 2013 khan European champion a nih pui bawk a, a vanglai chuan court chhunga player hmuhnawm bik zingah a tel. Parker chuan, "Tony Parker ang taka ka khel thei tawh loh a nih a, champion tum zingah ka tel phak tawh lo a nih chuan basketball khelhin awmzia a nei tawh lo," tiin a chawlh tur thu a sawi.

NBA regular season bikah Parker hian match 1,151 zet bul ṭantu zingah a tel a, match tinah point 15.5 nei anga chawlhrual a nih bakah, a ṭhiante basket neih tur vawi 5.6 zel a siamsak bawk. Playoff bikah match 226 a khel a, chawlhrualin 17.9 points leh 5.1 assists a nei bawk.

All Star zinga vawi ruk tel Perker chuan, "Basketball chawlhsan meuh chuan rilruin thil tam tak a ngaihtuah, zinkawng nuam leh ngaih-nawm tak tak ka lo tawn tawhna hmun a nih avangin hriatreng tawh tur a ni dawn. NBA leh France national team nena ka hun tawn hi engtikah mah ka theihnghilh tawh ngai lo ang," a ti.



Share this Post

Login to comment
No Comments