Nipui transfer a la ngaihnawm dawn chauh

UEFA Champions League-ah Liverpool-in Tottenham hnehin an champion a, English club ṭha pahnih hi Premier League aṭanga teh chuan nomawi la chawi lo an ni. League lama sulhnu nei ṭha zawk Manchester United erawh parukna an nih phak 

ṭawk avangin indinthar an mamawh a, Chelsea-in season ṭha takin khar mah se Eden Hazard bakah manager Maurizio Sarri an la chan belh thei a, champion lai Manchester City lahin duh khawp an la hmu thei lo.

Bundesliga-ah Bayern Munich-in nomawi an humhim a, amaherawhchu an champion danah leh Europe-a Liverpool laka an mualpho avangin transfer-ah thawm an nei lian. Italian champion Juventus leh French champion Paris-Saint Germain ten an ropuina chhunzawm zel an duh bawk.

Transfer a nih tawh chuan Spanish club lian Real Madrid leh Barcelona te hmaih an thiang lo a, anni hi chuan sum a neih bakah player khelh châkna an nih avangin an mit it zawng an hlah meuh lo.

Sum a tam

Real Madrid-in Zinedine Zidane an laklet rual khan nipui transfer-ah an thawm a lian dawn tih a lang a, tuna an lak chin ringawt pawh ngaihnawm tham a tling. Chelsea aṭangin pound maktaduai 88-in Eden Hazard an lalut a, Belgian forward hi Blues chauhin an chan lo a, Premier League pawhin a thlakna tur an hmu mai lo ang.

Los Blancos hian Eintracht Frankfurt aṭangin striker Luka Jovi (£58m), FC Porto aṭangin defender Eder Militao (£45) leh Santosh 

aṭangin winger Rodrygo (£40) te an lalut tawh. Zidane hian pound maktaduai 230 chho vel a hmang tawh a, a la duhtawk lo - Christian Eriksen leh Paul Pogba an la beisei cheu!

Barcelona-in an duh bik chauh an laka rinawm a, an lak turte erawh an hraw dawn. Ajax midfielder Frenkie de Jong chu pound maktaduai 65 in an lalut tawh a, defender hmabak êng ber zinga mi Matthijs de Ligt la turin an dinhmun a ṭha, Dutch player pahnih bakah hian Antoine Griezmann an lakluh ngei a rinawm bawk.

Amaherawhchu De Ligt bikah hian sum tam zawk nen PSG an rawn inlar a, French champion hi Neymar chhuhsaktu an ni a, Catalan club tan awm nuam loh phahna tham a tling ang.

Bayern Munich pawhin an mamawh lei nan sum an ui lo. Atletico defender Lucas Hernandez lak nan pound maktaduai 68 an theh chhuak a, pound matkaduai 31.4-in Benjamin Pavard an la bawk. German club lian hi an ram league ringawtah an lawm lo tih a lang.

Hriatthiam har United

Transfer-ah Manchester United thawm a lian a, an lakluh tawh erawh hming langsar lo Daniel James a ni daih thung. Amaherawhchu, United legend Wayne Rooney ril rem zawk tak a ni thung.

Kum 33 mi Rooney chuan, "Ole tan chuan hmabak nei eng player pound maktaduai 30-40 inkar man player paruk vel lakluh a fuh zawk. Ronaldo, Messi, Ramos emaw Bale te lalut se pound maktaduai 350 chuang an seng ang a, kum hnih hnuah chuan beisei tur an nei tawh dawn lo," tiin insiamṭhatna tur a tam avangin player pahnih khat manto deuha lak a rem loh thu a sawi.

Manchester United hian Leicester defender Harry Maguire leh Crystal Palace right back Aaron Wan-Bissaka te lak an duh a, Foxes hian United hi sum siam nana hman an duh a nih chuan a remchang ang. Chutihrualin Premier League club tin hian sum an ngah tawh avangin tun hma angin United-in club tenau zawk player awlsam takin an chhuhsak thei lo ang.



Share this Post

Login to comment
No Comments