Vettel aia tlan muang Hamilton a chak ber!

Pathianni zan a tlan zawh tak Formula 1 Canadian Grand Prix-ah Sebastian Vettel chu tlan ṭha ber ni mah se hremna a tawk a, chak lo zawka ngaih Lewis Hamilton chu pakhatna atan puan a ni.

Ferrari chuan an driver Vettel chu hnehna changtu dik tak nia an hriat thu an sawi a, German driver in 'five-second penalty' a chawi chu thuneitu sang lamah an khinglet a, he thu buatsaih lai hian thutlukna thar erawh siam a la ni lo.

Inelna chu

Hamilton-a'n a sawi lawk ang ngeiin Canada-ah Ferrari an tlan ṭha a, qualifying lama che ṭha ber Vettel-a'n pole position aṭangin intlansiak bul a ṭan a, harsa lutuk loin hmahruaitu a ni reng thei.

Mahse, world champion Hamilton-a'n a hnungah na takin a um ve reng. Lap 48-na, kawng kawi pathumna an tlan laiin Vettel-a'n kawngsir a dai a, tlan kawnga a luh leh danah a hnunga awm Mercedes driver chu a veng deuh niin a lang, hei vang hian second nga hremna pek a ni.

Ferrai driver Vettel-a'n hremna a hmuh vang hian tun season chhunga a vawi nga nan Hamilton-a'n hnehna a chang a, Britain tlangval hian intlansiak vawi sarih an hmachhawn tawhah point 162 hmuin hmahruaitu a nihna a sawhnghet chhunzawm zel.

Ferrari an lawm lo

An driver hremna pek a nih avangin Ferrari an lawm lo. Team boss Mattia Binotto chuan, "Kan lawm lo hle, a dinhmun kha ngun takin en ula, tlan kawng a rawn zawh leh pangngai thei kha a vannei zawk. A tan duhthlan tur dang a awm chuang lo. Vettel khan midang dip dal leh tih nat tumna a nei lo a, tihsual a neih kan hre lo," tiin an driver a chhan na hle.

World champion vawi li ni tawh Vettel chuan, "Ka car ke khan kawr sir tak a rap hial a ni a, inelna ṭha taka hmachhawn zui tur chuan eng thil dang nge ka tih theih chuan ang. Ka dam khawchhuah nan midang tibuai si loin track-ah ka let mai a ni," tiin intlansiak an neih zawh hnuah a lungawi loh thu a sawi ve bawk.

Kuminah Ferrari hian beisei an la phak thei rih lo a, an driver pahnih Vettel leh Charles Leclerc te tlan ṭha viau ṭhin mah se Mercedes an umphak thei meuh lo, hnehna chan hmasa ber lawm turin intlansiak dang an nghah leh rih a ngai tihna a ni.

Mercedes lam

Thil thleng chungchang sawiin Hamilton chuan, "Dan leh hrai a awm, kawng aṭanga kan tlan chhuak a nih chuan driver dang tibuai loin kan let tur a ni. Thil thleng avang khan kei chuan intihpalh hlauh vangin ka tlan muan phah ngei a ni," tiin Vettel chu a tlan pelhna tur dalah a ngai ve thung.

Mercedes F1 boss Toto Wolff chuan, "Thil thleng kha inhnial theih tak a ni ang, ka hmuh dan chuan hrem ngai an awm chuan ka hria. Hrem a ngai lo ti pawl an awm a nih pawhin ka dem lo, 60-40 vel a ni thei ang. Thu inchuh ni mah se hremna pek ngai ti an tam zawk ang," tiin a sawi.

Kuminah F1 intlansiak hi vawi 21 neih a ni dawn a, inelna vawi riatna atan June 23 hian Paul Ricard-ah Grand Prix De France an tlan leh ang. Canada-a thil thleng hian car intlansiakna lian leh sang ber boruak hi a chhem nung thar hle tura ngaih a ni.



Share this Post

Login to comment
No Comments