Mangṭha Yuvi; Yuvraj Singh a chawl ta

Indian cricketer ropui ber pawl Yuvraj Singh chuan nimin khan international cricket a chawlhsan thu a puang a, "Kum 25 meuh a liam takah chuan chawlh ka tum ve ta," tiin nimin khan media hmaah a chawlh thu hi a puang. 

Kum 37 mi cricketer hian Indian Premier League pawh a khel tawh dawn lo a, mahse ram pawn lamah Twenty20 league hrang hrang khel kual tura a inbuatsaih thu erawh a sawi thung. 

Cancer natna meuh pawh lo hneh tawhtu Yuvraj hian kum 2017 hnu lamah India jersey a ha leh tawh lo a, IPL season hman zawh takah khan a beisei angin hmun a chang tam tawk lo bawk. 

Yuvraj chuan, "He game hian huaisen taka bei turin min zirtir a, hrehawm laia awm dan min zirtir a, intuaithar dan min zirtir a, thawh dan min zirtir a, hmalam pan dan thlengin min zirtir a ni,"  a ti.

Yuvi leh India

Yuvraj hian India tan Test 40, ODI match 304 leh Twenty20 international match 58 a khel hman a, test-ah run 1900 siamin a hlawhtlinna ber tia chhal ngam ODI-ah run 8701 a siam a, T20-ah run 1177 a siam bawk. 

Six run a vuakchhuah theih em avanga Sixer King an tih chuan, "India tana match 400 ka khel tling thei kha ka inchhuang takzet a, cricket ka khelh hmasak ber khan ram tana heti zat khelh hi ka suangtuah phak lo," a ti. 

Yuvraj chuan sawi zawmin, "He game nena kan inlaichinna chu huatna leh hmangaihna inchawhpawlh ang mai a ni. Ka tana a hlutzia hi ka sawifiah thiam lo. Ka hlawhtlin aia tam ka hlawhchham a, mahse ka beidawng ngai lo ang," a ti a, cricket chu a tan zirtirtu ropui a nih thu a sawi. 

Batsman a nihna piahlama slow left-arm orthodox ni bawk Yuvraj hian bowling lamah pawh India tan a thawhhlawk a, ODI-ah wicket 111 lain test-ah pakua a la a, T20I-ah wicket 28 a la thei bawk. 

Yuvi leh ropuina

Kum 2007-a a vawi khat nana 2007 World Twenty20 khelh a nih khan Yuvraj hi Player of the Tournament-ah thlan a ni a, 2011 World Cup-a India an champion khan player ṭha berah thlan a ni leh a, final-ah man of the match a ni bawk - a ropuizia sawi nep theih a ni lo. 

Yuvraj Singh chuan, "World Cup 2011 nomawi chawi a, man of the series hial nih leh, man of the match chawimawina vawi li lai dawn kha ka tan chuan mumang ang vek mai a ni," a ti. 

Mahse, Yuvraj hi a career-a a tawn san ber laiin cancer natnain a tibuai. Punjab tlangval chuan, "Van sang tak han tawn hnua, rang taka lei deng zawnga tlak leh ang mai a ni. Mahse, kha hun harsa ka tawn lai khan ka fans, ṭhian leh chhungte ka tan an ding tlat a ni," tiin lawmthu a sawi zui. 

September 2012 a herchhuah meuh chuan Sri Lanka-a 2012 ICC World Twenty20 khel turin Yuvraj a rawn kir leh a, format hrang hrangah India tan player pawimawh a nih chhunzawm. 

Yuvi leh T20

Yuvraj-a'n mimal chawimawina dawn theih ang a dawng kim a, India tan nomawi chawi theih ang a chawi kim a, Indian Premier League-ah cricketer tam tak mangphan a ti hlawhtling vek bawk. 

Season hman zawh tak IPL-a Mumbai Indians tana inlan Yuvraj chuan, "IPL 2019 kha IPL-a ka hun tawp ni turin thutlukna ka lo siam fel tawh a, match tam zawk khel ila ka duhthusam a ni," a ti a, a season tawp bera a khel tam tawk lo chu a ui hle. 

Yuvraj chuan sawi zawmin, "T20 erawh khelh reng ka la duh a, hahdam tak leh nuam ti takin inelna hmachhawn ka duh. International career ngaihtuah chunga IPL khelh bawk kha chu a hahthlak em em a ni. 

"BCCI lamin phalna min pe a nih chuan ram pawn lamah T20 ka khelh chhunzawm ang," a ti a, cricket hrim hrim mangṭha a la tum lo. 



Share this Post

Login to comment
No Comments