Nations League pathumna England

England-in UEFA Nations League final lut zo ta lo mah se kut ruaka Portugal kir san erawh an duh bik lo a, penalty-ah Switzerland hnehin pathumna an ni. 

Team pahnih hi hun pangngaiah goal khung loin an inhnehtawk a, penalty hmangin chak zawk an zawng. England tana pettu ten an pet goal vek laiin Switzerland tan Josip Drmic chuan a pet goal lo a, 6-5 in England an chak. 

Three Lions tana penalty chhuih luttu zingah Jordan Pickford a tel a, Everton keeper hian Drmic-a pet a dan bawk avangin England tan chuan 'hero' a ni. 

Inkhel chu

Portugal-a Estadio D. Afonso Henriques stadium-a inkhelah boruak a sang tawk lo a, England fans thawm ring viau mah se fan-te phurna chawm let turin inkhel a hmuhnawm tawk lo. 

England erawh chak phu zawk an ni tho tho a, Harry Kane leh Raheem Sterling te chuan woodwork an tih per ve ve a, Dele Alli shot ṭha tak chu Swiss keeper Yann Sommer-a'n a dan sak a, Callum Wilson goal khung pawm a ni lo bawk. 

Bournemouth striker goal khung hi video assistant referee (VAR) hmangin en let a ni a, a goal khung hma hian Manuel Akanji lakah a foul nia a lan avangin pawm sak a ni lo. 

Liverpool duo

England tan Liverpool rawlthar duhawm pahnih Trent Alexander-Arnold leh Joe Gomez ten inkhel bul an ṭan ve ve a, Champions League nomawi chawi hlim pahnih hi an khel ṭha takzet. 

Alexander-Arnold-a'n vawi 18 ngawt cross a nei a, June 2009-a England-in Andorra an hmachhawn ṭuma David Beckham hnua (19) England tana match khata cross ngah ber a ni. 

Kum 20 mi defender hian Switzerland lakah goal khungna chance vawi sarih a siam a, England tana ani aia chance siam hnem zawk hnuhnung ber chu James Milner a ni a, 2014-a San Marino an hmachhawn ṭumin vawi kua chance a siam. 

Beiseina nen England

England-in World Cup semifinal an luh hnuah an thlen chin chu tihpalh thil a ni lo tih an pholang a, UEFA Nations League semifinal an lut leh ngat - he team hi eng ram pawhin hmachhawn an chak tawh lo ang. 

Three Lions boss Gareth Southgate chuan, "Hmalam pan zel hi kan vaiin kan duh vek a, ṭha taka khelh tum khan ka player-te pawh an inbuatsaih nasa hle. National team hi chuan chance tam tak kan nei lo tih kan hria a, chuvang chuan kan hun ṭha neih hi chhawr kan duh lehzual a ni," a ti. 

England player an naupang rual a, captain Harry Kane pawh kum 25 mi chauh a la ni. Defender rinawl la ni tur Joe Gomez leh Arnold te pawh kum 23 hnuai lam ve ve an la ni a, Raheem Sterling leh Dele Alli ten kum 25 pawh an la kai lo - Three Lions hmabak a eng hle. 



Share this Post

Login to comment
No Comments