India-in champion lai Australia an hneh

India chuan Pathianni khan run 352/5 zet vaw chhuakin Cricket World Cup champion lai Australia chu Oval-ah run 36-in an hneh. 

Men in Blue tan Shikhar Dhawan chuan run 117 a siam a, captain Virat Kohli pawhin run 82 a vaw chhuak. Aussies lam tan hnehna chang turin World Cup record siam a ngai a, run 316 zet siam tling mah se chak nan a tawk lo.

Mipui an phur

Oval-a entu tam zawk chu kawr pawl ha an ni a, India ṭantute an ni. Ṭhumvawrah Virat Kohli chakin bat hmasak a thlang a, South Africa an hneh ṭuma 'hero' Rohit Sharma chuan Pat Cummins-a ball vawm hmasa ber chu hmachhawnin mipui thawm a 

ṭha nghal hle.

Australia pace bowler Cummins leh Mitchell Starc te hmaah Rohit leh Dhawan te an fimkhur a, run an siam chak lo. Over sarih zawhah pawh run 22 chauh an siam a, an dawh thei hle. Entu mipui aṭangin Indian batsman ten thlawpna an hmu ṭha - 'defensive shot' ah pawh lawmna tur an hmu tho.

Dawhtheihna rah

India batsman-ten an dawhtheih rah an seng a, insiam rem hret hretin over 10-ah run 41 siam tawhin hma an sawn hret a, wicket an hloh har avangin an khel ṭha tulh tulh.

Australian bowler ten chet ngaihna an hre lo a, Adam Zampa, Nathan Coulter-Nile, Glenn Maxwell leh an chhuanvawr Mitchell Starc te hmaah India bastman-te theihna tak tak a lang. India tana bat hmasa pathum Dhawan, Rohit (57) leh Kohli (82) ten run 50 an vaw tling vek a, a hnuhnung pahnih Hardik Pandya (48) leh MS Dhoni (27) te strike rate chu 177.78 leh 192.86 a ni pha daih.

World Cup bikah Australia laka siam hnem ber chu Sri Lanka an ni 

ṭhin a, 2015 khan Sydney-ah run 312 an siam. India hian WC-ah Aussies laka run siam tam ber ni turin Oval-ah run 352 an siam a, ball tawp bera KL Rahul-a 4 runs vuak chuan top order ang thoin middle order ten an hna an tlin tih a pholang.

Kohli, Smith leh Warner

Ball tampering vanga an 'boo' nasat  Steve Smith leh  David Warner te chu India ṭantute pawhin an au el tho a, amhaerawhchu captain Virat Kohli inrawlhin inkhel entute chu au el lo turin a ngen. Australia captain hlui Smith pawhin India captain chet danah a lawm tih lantirin a chibai 

nghe nghe.

Australia opener Warner hian run 56 a siam a, amaherawhchu ball 84 zet a hmachhawn avangin an chak lohna chhana mawhphurtute zinga mi a ni. Aussies batsman an che ṭha rual a, Warner hnuaia awm batsman pali captain Aaron Finch (36), Steve Smith (69), Usman Khawaja (42) leh Glenn Maxwell (28) ten run mawi hnai tak an siam vek a, wicketkeeper Alex Carey-a'n ball 35-ah run 55 zet a vaw chhuak bawk.

Amaherawhchu India-in run 352 zet an siam a, Australia tan pawh a tam lutuk hret. Bhuvneshwar Kumar leh Jasprit Bumrah ten wicket thum ve ve an la a, Aussies hian over 50 bat hman mah se an thi vek a, run 316 an siam.

Eng nge an sawi?

India captain Virat Kohli chuan, "Kan hmachhawn hnuhnung berin Australia-in series an la a, chuvangin tun ṭuma kan chak hi a hlu lehzual. A tute pawh khan kan bat ṭha vek a, captain tan chuan kan khelh dan kha a lawmawm takzet a ni," tiin a sawi.

Australia captain Aaron Finch chuan, "Over hnuhnung 10-ah run 120 an siam a, a tam mah mah a ni. Kan vawm ṭha tawk lo a, chubakah keini aiin an khel ṭha zawk a ni," tiin an chak lo tih a pawm.

Shikhar 'The One'-a zunzam 

General ropui George Patton khan, "Mahni ram tana nunna hlan ai chuan kan hmelmate an ram tana an nun kan hlantir hian, hnehna dik tak a ni" a lo ti a nih kha maw.

Pathianni, Oval, London-a India leh Australia inkhelah khan, an danglamna leh inthlauhna sawi tur a tam lo. India-in Shikhar Dhawan an nei a, Australia in an nei ve lo - chu mai te chu a ni awm e. Aaron Flinch-a leh a hote beiseina tihtawp saktu Dhawan-a innings kha World Cup hlimthla pakhat a ni reng tawh ang.

Delhi chhulchhuak

India rama cricket hmunpui pathumte chu Mumbai, Bangalore leh Delhi tih a ni ṭhin. Mumbai leh Bangalore te hi chuan technique dik te, khelh dan mawi leh nungchang dik (gamesmanship) an thupui 

ṭhin a, Delhi chhuak erawh hi chu, a ruh no no chhuakah tih leh an Association Politics chiri lutuk avang khuan an rothap a, an ngeng ngalh zel tih a ni ṭhin.

Tun ṭuma India leh Australia inkhelh ṭum pawh a, Australian fast bowler 

ṭha Mitchell Starc leh Pat Cummings, naupang chhia ang maia cheitute kha Delhi val pahnih Shikhar Dhawan leh captain Virat Kolhi te an nih kha maw. 

London Thlahrang

Shikhar Dhawan a kutzungpui kha Cummings-a'n a vawm nat sak hnu khan, a bat humdan khan ngai a awh chiah lo tih a hriat a, fielding tur phei chuan a rawn chhuak ta lo nghe nghe a nih kha. Mahse na nei chunga Oval pitch mam (flat) ṭha lutuk batsman tan duhthusam hun ṭha kha Shikhar Dhawan a tan bawhpelh chi a ni lo. Oval boundary-ah Australian fielder-ten ball an inchhar chhawk chu a ni ber e.

Chawlhni zana Shikhar Dhawan-a'n Century a siam chiah khan, Kohli a te ho nena lo kaihruaitu, tun dinhmun an thlen theih nana mi pawimawh tak, Delhi Cricket-ah chuan an zah em em Rajat Bhatia chu Vanglaini Silly Point pualin ka bia a. Chuta a sawi chu, "Zanin Shikhar a century kha, Delhi chhuak innings dik tak a ni e. Game level hi a san zawh poh leh technique leh skills ai mahin, mental (rilru) a fit apiang dinchanna a ni tawh mai" a ti. Kum 20 chuang first class cricket khel tawh leh IPL star Rajat Bhatia sawi hian ka duhtawk mai ang e.

Bowlers Thlanmual

Tun World Cup ah hian England nipui tantir leh ruah la sur duh hunlai ni bawk nen, bowlers lam hi an la che ṭha mah zawk a. Khawvel kalphung pangngaiah chuan, khua a rawn ro telh telh ang a, pitch a ro in a mam telh telh ang a, bowlers aiin batsman-ten ro an rel telh telh dawn tih chu hriat sa a ni a. 

Amaherawhchu, a ni khatna 

aṭang khan Oval hi chu a dang bik tlat. Run 300 chuang pawh target him a ni lo tih a tilangchiang ta hle. Bowlers ṭha Mitchell Starc te, Jasprit Bumrah te pawh an khelh ṭhat ber ni chu a ni lo chiang a. Spinner Yuzvendra Chahal te, Kuldeep Yadav leh Adam Zampa te pawh, bowler hmatawng ai mahin, overs hnawh khattu ang maiin an lang a ni ber e.

Run a sur

Batsman paruk ngawtin half century an siam a. A ni, Shikhar Dhawan a phei chuan century a siam hial a ni. Strike rate 100 chunglam deuh vekin an hlap a. Hardik Pandya ball hlap theihzia kan hmu a, Australia keeper Alex Carey-a pawh India fan-te thinphu tirangtu a ni bawk. Mahse a tawpah chuan Shikhar Dhawan-a innings kha team pahnih daidangtu kan ti lo thei lo ang.

Kal zel ang

He World Cup zinkawng hi a chanve pawh kan la thleng lo a. India leh Australia hian team ṭha an nihzia an pholang tawh a. Tun anga an kal zel a nih chuan July 14 a Lords a final khelh hunah, he team pahnih bawk hi an intawng a nih pawhin a mak lo ang.



Share this Post

Login to comment
No Comments