Messi leh Suarez tel lohna Barca an chelh

Manchester United nena Champions League quarterfinal khel chau hlim Barcelona-in player tam zawk dah ṭha chungin Huesca an lenchilh a, goal khung loin an inhnehtawk. 

Table aṭanga team pahnih dinhmun thlir chuan inthlau tak an ni - Barca hi a chung berah an awm a, team 20 inelna league-ah Huesca hi 20-na an ni thung!

Mahse, Inrinni zana team pahnih an intawn ṭumah erawh ropui zawk an awm lo a, goal an khung theih loh ve ve avangin point an insem a, table-a an dinhmun pawh a danglam phah lo. 

Inrinni zan inkhel dangah Atletico Madrid an inlan bawk a, Celta Vigo chu 2-0 in an hneh. Madrid khaw club tan Antoine Griez­mann leh Alvaro Morata ten goal khat ve ve an khung a, table-ah pahnihna an nih chhunzawm zel.

A vawi khatna!

Barca tan player pawimawh zingah captain Lionel Messi leh Sergio Busquets chu chawlh hahdamtir an ni a, Luis Suarez leh Gerard Pique chu hrem vangin an inlan thei lo. 

Catalan club player pawi­mawh zingah Ivan Rakitic chu damlohna avangin chawlh hah­damtir a ni a, Sergi Roberto chu hliam vangin a inlan thei lo thung. 

Hetiang boruak karah hian Barca fan-ten an khel an la hmuh meuh loh defender pathum Jean-Clair Todibo, Jeison Murillo leh Moussa Wague bakah midfielder Riqui Puig te chu a vawi khat nan league match khelhtir an ni.

Thla khat zet hliam vanga a inlan theih loh hnuah Ousmane Dembele pawh inkhel bul ṭantir a ni a, Kevin-Prince Boateng chu Barca a pan hnua a vawi thum nan a inlan bawk. 

Inkhel chu le

Huesca khelmualah player langsar tam zawk khel loin Barca inlan mah se inthlahrun phah nan erawh an hmang lo a, 74% ngawt ball an chang - heti chung hian a pawimawh ber goal erawh an khung thei lo. 

Barca tana hun ṭha bera chhal ngamah Malcom a inlar a, mahse kum 22 mi Brazilian forward hian Messi leh Suarez awm loh hlana a hming chher turin a hun ṭha neih a chhawr ṭangkai thei tlat lo - tun season-ah match 19 khel tawhin goal li chiah a la khung. 

Rei tak a chawlh hnua lo kir Ousmane Dembele eng ruai a la ni bik rih lo a, amah thlak tura luhtir Philippe Coutinho-a'n an mamawh goal a keng tel bik lo. 

Khawvel barakhaiha Sas­suolo aṭanga loan-a Barca pantu Kevin-Prince Boateng-a'n a vawi thum nan chance nei ve chauh mah se a hun neih tlem takah Barca tana jersey hak a phu tih a lantir thei lo a, goal awm loin team pahnih an inhnehtawk. 

Atletico an chak

La Liga inkhel dangah Atle­tico Madrid-in Barce­lona an thlah fal duh bik lo a, 2-0 a Celta Vigo an hneh avangin Barca nena an inthlauhna chu point kuain an sawr zim. 

Atletico tan striker chhuan­vawr Diego Costa chu match riat atan hrem ni mah se Spain international tel loin Atletico an talbuai lo. Antoine Griezmann chuan goal hmahruai a khung. 

French forward hian Alvaro Morata tan a siamsak zui a, Chelsea aṭanga loan-a an hawh striker hian an ramah season duhawm a hmang zel - Atletico tan league match 10-a goal nga a khungna a ni. 

Morata hian tun season chawhma lam Chelsea-a hun a hmanah khan league match 16-ah goal nga khungin assist a nei lo a, Atletico-ah erawh match 10 lekah goal nga khungin assist vawi khat a nei thung - a thiam a la theihnghilh lo. 



Share this Post

Login to comment
No Comments