MCL Auction - Abhay Joshi man a to ber

Mizoram cricket inelnaa sum tamna ber Mapuia Cricket League chu April 23 aṭangin khelh ṭan a ni dawn ta a, Inrinni zan khan player lilamna neih a ni. 

Aijal Club-a auction neihah hian Abhay Joshi chu player manto ber a ni a, Ṭhuampui tlangval hi Kulikawn chuan Rs. 27,000-in an lei. 

MCL auction-a player lei nana sum seng hnem ber chu Kulikawn hi an ni nghal a, player lei theih tlem ber pathum lek an la chungin Rs. 41,000 an seng. 

Player lei nana club pangain sum an sen zawng zawng belhkhawm chu Rs. 1,44,000 a ni. 

Hei le Joshi

MCL-a player manto ber Abhay Joshi hi Mizoram cricket-ah chuan hming langsar leh tawnhriat ngah ber pawl a ni a, Kulikawnin Rs. 27,000 ngawta an ngam hi thil mak a ni lo. 

Kum 35 mi batsman hi Mizoram team player a ni a, Ranji Trophy-a Mizoram inlan hmasak berah pawh squad-a koh zingah a tel. 

Andrew Vanlalhruaia (Chhinga Veng CC), K. Lalhmingmawia (Kulikawn CC) leh Zomuansanga (Zarkawt Lords) te chu Rs. 11,000 man ṭheuh niin player manto pahnihna an ni. 

MCL khel tur club-te hi auction-ah player pathum tal lei tura tih ni mah se an player neihsa te chelh phal sak an ni a, hei vang hian auction-ah club ten sum an seng hnem lo. 

Chanmarians inlan dawn

MCL-ah hmun ruak a awm a, hei hi auction neih zanah lilam a ni. First division inelnaa beisei an phak loh avanga MCL tling sa zinga tel lo Chanmarians chuan hmun ruak hi Rs. 50,000-in an lei. 

Chanmari club hi hmun ruak leitu an nihna angin player pahnih chu Rs. 5,000-in an lei thei a, hei vang hian auction-ah hian player lei nan Rs. 15,000 bak an inseng lo. 

Player lei hnem ber chu Zarkawt Lords niin player paruk an lei a, an sum sen zat erawh Rs. 35,000 a ni. 



Share this Post

Login to comment
No Comments