Dortmund chakna Sancho goal hnih

Jadon Sancho chuan a rah chinah sulhnu ṭha leh ropui a hnutchhiah mek zel. England forward hian Mainz lakah goal hnih khungin Borussia Dortmund chu 2-1 in hnehna a chanpui a, a club hi Bundesliga hmahruaitu a nih pui nghal bawk.

Kum 19 mi Sancho hian tun season-ah league goal 10 a khung tawh a, season hmasa lama goal khat a neih tawh nen German football inelna sang ber Bundesliga bikah goal 11 khung thei naupang ber a ni.

Inrinni zan Signal Iduna Park-a inkhelah Sancho hian Mario Gotze-a cross chu laklawh nei loin minute 17-naah a khung a, minute sarih hnuah Thomas Delaney siamsak khung lehin dinhmun ṭha takah Dortmund a dah - hun tawp dawn lama Robin Quaison goal khungin awmzia a nei phak tawh lo.

Lucien Favre-a naute hian match 29 khelh aṭanga point 66 hmuin hmahruaitu an ni a, champion lai Bayern Munich aiin point hnihin an sang zawk. Bayern hian nizan khan Fortuna Dusseldorf an hmachhawn a, an result a zirin an dinhmun a la inthlak leh thei ang.



Share this Post

Login to comment
No Comments