Chak loh thiang lo Brazil

World champion ni tura beisei ni chungin Brazil-in Russia an pan a, an match hmasa berah Switzerland chu 1-1 in an inhnehtawkpui nghal!

Samba Boys tia hminglem an pek team hi vawiin tlai dar 5:30-ah Costa Rica nen an inkhel dawn a, last 16 lut tur chuan chak zawh loh a thiang tawh lo.

Brazil coach Tite chuan, "Kum 1998 World Cup hnuah point nga hmu chin team chuan last 16 an lut zel," tiin a sawi a, an hmabak match hnihah point li an hlawhchhuah chuan knockout round an luh theih thu a sawi.

Costa Rica hian an match hmasa berah 0-1 in Serbia an ngam bik lo a, an tana point hlawhchhuah beisei ngamna zawkah kut ruaka minute 90 an khar avangin Brazil hi chu a harsa lehzual tawh ang.

Group E inkhel dangah zan dar 11:30 hian Serbia leh Switzerland an inkhel dawn bawk a, team pahniha chak zawk tan last 16 a chiang deuhthaw thei ang–Serbia hian Costa Rica an hneh tawh a, Switzerland-in Brazil an draw thung.

Neymar a dam

Brazil player zinga sawi hlawh ber chu Neymar a ni a, Paris Saint-Germain forward hi hliam vanga rei tak a inlan loh hnuah World Cup hmain a dam hman a, friendly match pahnihah inlanin goal hnih a khung nghal.

World Cup-a an match hmasa berah erawh Neymar-a'n beisei a phak lo a, Switzerland defender rual ven karah a tal put thei meuh lo–vawi 10 tih tluk a ni a, 1998 World Cup hnua player pakhatin match khata foul a tawrh hnem ber ṭum a ni!

Thawhlehni zan khan training-naah Neymar a inhliam zui a, Brazil FA thuneitute chuan an thiampuipain hliam a tawrh leh chhanah Switzerland player-ten an bitum bik vang niin an sawi hial.

Mahse, Brazil fan-te tana thu hriat nuam turin Neymar hian pangngai takin training a zawm leh tawh a, a hliam a hnuchhawn leh tawh–Costa Rica laka vul turin beisei a ni ang.

Pawnah aiin khelmualah

Brazil match hmasa bera goal khungtu chu Philippe Coutinho a ni a, Barcelona midfielder hian a thiam chi ang takin penalty area pawn aṭangin mawi zetin goal chung kilah a khung.

Liverpool midfielder hlui hi khelmual pawn lamah chuan mi zakzum tak nia sawi a ni a, Coutinho pawhin hei hi a pha lo. Kum 26 mi midfielder hian press a hmachhawnnaah, "Ni e, in bula ṭhut ai chuan khelmual nuam ka ti zawk," a ti!

Zaninah Brazil ṭantuten inthlahrung lo taka Coutinho che tla lai hmuh an tum ang a, Willian, Neymar leh Gabriel Jesus ten match hmasa aia an khelh 

ṭhat a ṭul bawk ang.

Brazil coach Tite-a'n player a thlak danglam dawn em a hriat loh a, midfield-ah inthlak danglamna a awm a nih chuan Fred leh Renato Augusto te an luh a rinawm a, hetihrual hian game hmasaa beisei phak lo Jesus aia Roberto Firmino a luh pawhin a mak lo ang.

Beiseina & Cotsa Rica

Serbia hneh lo team tan Brazil lakah beiseina neih san a harsa a, hetihlai hian Costa Rica midfielder Celso Borges chuan hnehna chang tura beiseina an neih thu a sawi.

Deportivo de La Coruna midfielder chuan, "Thawhrimna leh result ṭha tak hmanga World Cup inpetkai kan ni a, thil awlsam a ni lo. He kan theihna ang tak hian kan khelhchhuah a ṭul a, hnehna kan chan theih pawh ka ring a ni," a ti a, beiseina a nei.

Costa Rica captain Bryan Ruiz chuan, "Kum li danah World Cup khelh a ni a, tlin reng a harsa em em bawk. Hun ṭha kan neih chhun hi kan chhawr thiam tur a ni," a ti a, group stage-a Russia mangṭha mai a tum lo.

World Cup 2014-ah khan Costa Rica hian quarterfinal an lut a, Uruguay, Italy leh England awmna group aṭanga hmahruaitu nichungin last 16 an lut–an thawnthu hlui beiseina nei tura infuih nan an hmang ang.



Share this Post

Login to comment
No Comments