Vanneihna leh VAR hmangin Spain chak

Spain-in Fernando Hierro hnuaiah hnehna an chang ve ta. Nilaini zanah La Roja-in Iran laka point thum hlawh chhuak turin Diego Costa vanneih goal leh Team Melli goal pawm sak lo turin VAR ṭanpuina an hmu bawk.

Kazan Arena-ah Costa hian minute 54-naah goal awmchhun a khung a, Spain hi Portugal nen point li hmuin group B hmahruaitu an ni a. Iran-in an match hmasa bera Morocco an hneh avangin point thum nei tawhin beisei an la nei a, Africa ram aiawh Atlas Lions erawh an tla tawh thung.

A hlawhtling zawk Iran

Spain-in ball an chang a, goal khung an tum. Iran lamin awmze neiin goal venhim hna an thawk a, Real Madrid manager hlui Carlos Queiroz-a duh danin Team Melli-i'n an khel chhuak.

Iran hmatawng zinga awm hmasa ber Sardar Azmoun pawh goal khung tur a nih rualin goal venhim chu a hna pawimawh zawk niin a lang. Spain-in ball an chan tawh chuan Rubin Kazan forward Azmoun hian La Roja ball semtu ber Sergio Busquets a hnaih nghal zel.

Hierro hoten first half an thunun hlak a, 81% hial ball possession nei pha mah se an tum ber goal an khung thei lo. Spain-in Iran tlarhnung phui ṭha tak an ṭhiah theih si loh vangin Queiroz-a hote an tumah an hlawhtling zawk.

Spain an vannei zawk

Second half-ah pawh inkhel kalhmang a danglam lo a, inkhel nghawng danglam thei pahnih a thleng thung.

Minute 54-naah Diego Costa chuan box chhungah Iran player pahnihin an chilh chungin a lalut a, a tal chhuak zo dawn lo niin lang mah se Ramin Rezaeian-a'n clear a tum chu Costa khupah perin goal kilah tak a lut.

Goal hmaa vannei Spain hi goal venhim kawngah an vannei a, minute 10 hnuaah Iran-in an chhanglet nghalah an inngai a, box chhung buai deuh karah Saeid Ezatolahi-a'n kawh zetin a pet lut. Spain keeper David de Gea dem tur ni lo mah se Manchester United keeper hian goal zawna ball kal awmchhun a chhuah a, amaherawhchu VAR hmanga en let a nih hnuah offside vangin pawm a ni lo.

Hmabak chu

Spain-in nuam sain hnehna an chang lo a, amaherawhchu an khelh dan thlirin an phu ang ngeiin point thum an hlawh chhuakah a ngaih theih. Iran erawh an ṭan tluan theih loh avangin knockout stage thleng turin Thawhṭanni zan dar 11:30-a Portugal an hmachhawn hunah chak ngei a ngai tawh ang.

Group stage match hnuhnung ber hi a ruala khelh tur a ni a, Spain tan last 16 lut turin beisei tur nei tawh lo Morocco lakah point khat hlawhchhuah a tawk.



Share this Post

Login to comment
No Comments