World Cup 2018 A hlimawm, a ngaihnawm, chanchin a tam!

'The Greatest Show on Earth' (Khawvela ennawm ropui ber) tih meuhin a hming an pe a, FIFA World Cup meuh chuan khelmual chhung piahlamah chanchin a ngah hle.

Fans ṭhenkhat chuan World Cup en an duh avangin an hna an bansan a, a ṭhenin loan an puk a, a ṭhenin an in leh car an hralh a, cycle-a Russia thleng in khalh thleng tawk lah bo lo!

Ni e, ennawm ropui ber tih a nih miau avangin vawi khat pian manah a hmuna World Cup en ngei mi tam takin an duh a, engti hawi zawng pawha World Cup en tum an tam–chungte chu khelmual pawn lama chanchin ti ngaihnawmtu hlei hlei an ni si.

Zinkawng thui...

Peru fans pahnih Edgar leh a ṭhianpa, kum 80 mi Manuelito te chuan Russia pan tur hian an zinkawngah thlawhtheihna pathum ngawt an hman a ṭul a, darkar 10 chhung train-ah an chuan a la ngai cheu!

Edgar chuan, "Zinkawng hahthlak tak a ni a, mah se he World Cup en lo hian engtinnge ka awm theih ang? World Cup khel leh tur hian hun rei tak kan lo nghak tawh a, ram danga kan hnam hla sak leh hlan hi kan nghahhlelhna a rei tawh a ni.

"Ka ṭhian pakhat chu Los Angeles-ah hnathawkin a awm a, chawlh an pe thei si lo a, a hna a bansan ringawt mai a ni. Peru lamah kan rualin a lo haw ve tawh ang," a ti!

Thla hnih lek!

Panama fan pakhat Pedro an tih chuan an rama a hnathawh lai chu bansanin Russia hi a pan a, pawisa a neih tlem miau avangin sum sen tlem theih dan ber a ngaihtuah a, Russia thleng tur hian thla hnih hun a hmang!

Pedro hian a zinkawngah car chhunga riah mai chang te, mi in remchanga riah luh mai te a nei a, a chang chuan 'lawng' ah a chuang a, Madrid pan dawna loh theih loha Thlawhtheihnaa chuan ngai kha sum a sen hnem ber ṭum a ni.

Panama fan ruhkawl hian Russia a thlen theihna turin a tih theih zawng zawng a ti a ni ber a, kal lama a zinkawng bawk zawh leh a tum avangin Panama thleng leh tur chuan thla hnih vel a la mamawh dawn–World Cup zet zawng!

To Russia with love

World Cup-ah India a la inlan ve lo a ni mai thei a, chumi avang chuan he inelna hian ngaihhlut erawh a hlawh loh phah chuang lo. Kolkata khawpuia nupa tuak Pannalal leh Chaitali Chatterjee te chuan 1982 Spain aṭang khan a hmunah ngei World Cup an la en ziah.

Pannalal hi kum 85 mi a ni tawh a, a nupui Chaitali hi kum 76 mi a ni tawh thung. Pannalal chuan, "Kum 2022-ah chuan kum 90 ka hnaih ve thuak tawh ang a, Qatar World Cup hi chu ka en theih ka ring tawh lo," a ti a, Russia hi a World Cup zinkawng tawpna turah a ngai.

Kum 85 mi Pannalal chuan World Cup en tura an in tuak nan hian an nupa chuan an chawhmeh duh zawng thlenga an lei ngam loh thu a sawi! FIFA Under 17 World Cup India-in a thlen khan FIFA chuan sawm bik zingah an telh a, Brazil 2014-ah phei kha chuan FIFA chuan an inpekna hriain an thlenna tur a thlawn vekin a buaipui sak a, local television company chuan an ticket tur an ngaihtuah sak bawk.

Kerala leh World Cup

India-in tun World Cup-a chanchin ngaihnawm dang a neih chu Kerala tlangval Clifin Francis chanchin a ni. Kum 28 mi Clifin hian World Cup en turin cycle ngatin Russia a thleng!

Francis hian February 23 khan Kerala chhuahsanin Dubai chu thlawhtheihnain a pan a, Dubai-ah hian cycle leiin Iran thleng lawngah a cycle hi a phur leh a, kilometre 4000 zet inkhalh chungin Russia a thleng.

Eizawnna lama software engineer Francis chuan, "Ka hriat ngai reng reng lohten an inah min thleng a, ei tur min pe a, mi ṭha tam tak ka tawn phah a ni," tiin a zinkawng ngaihnawm chungchang a sawi.



Share this Post

Login to comment
No Comments