October thla aṭangin I League

Nimin khan All India Football Federation League Committee chu AIFF Headquarters, Delhi-ah an ṭhu khawm a; Hero I-League, AIFF Youth Leagues leh 2nd Division League chungchang an rel. 

Mizo club Aizawl FC telna I League chu October kar thumnaah neih ni se tiin an rel a; committee hi AIFF senior vice president Subrata Dutta-a'n a kaihruai a, League Committee secretary Lalnghinglova Hmar leh member dangte an kal kim vek.

I League chu

Hero I-League tel tur club-te hnenah league committee chuan infrastructure chungchanga zawm tur a rang thei ang berin an thawn ang a, club lamin live telecast tura ṭul ang nen September thla laihawla peih fel hman tur a ni ang. 

AFC Asian Cup awm laiin I League khelh chhunzawm tur a ni a, amaherawhchu Indian club khelh niah erawh match a awm dawn lo thung a ni.

Foreign player quota chu season liam ta ang thoin paruk a ni dawn a, season thara a danglamna tur erawh Asia player lak kher a ṭul tawh dawn lo. 2019-20 season aṭang chuan foreigner hi paruk aṭangin pangaah tih tlem a ni ang.

AIFF chuan inelna hmachhawnte ṭanpui nan team tin hnenah nuai 45 ṭheuh pe turin a rel bawk.

Youth League chungchang

AIFF Youth League chungchangah Special Committee chu June 7, 2018 khan Mumbai-ah neih a ni tawh a, Under 13 leh Under 15 category-a player-te kum endik dan tur chu an pawm sak a ni. 

Special Committee chuan inelna hmachhawn tur player zawng zawngte document chu a ruala enfiah vek ni se a ti a, AIFF hnuaia a buaipuitu bik committee-in an lo pawmpui leh ang.

Youth League-ah Sports Authority of India (SAI) team tih loh chu club neitu inang tel phalsak an ni dawn lo.



Share this Post

Login to comment
No Comments