Ronaldo a Ropui zel, Morocco an tla

Portugal-in nizan khan Cristiano Ronaldo goal hmangin Morocco 1-0 an in hneh a, FIFA World Cup knockout stage thleng turin an dinhmun a ṭha hle. Group B inkhel dangah nizan vek khan Iran leh Spain an inhmachhawn a, result kan hre hman lo. Hei erawh a chiang, Morocco chu tun World Cup-a tla hmasa ber an ni.

Real Madrid forward Ronaldo hian ram tan goal 85 a khung chiah a, European player zinga ram tana khung hnem ber ni turin Hungary leh Real Madrid star hlui Ferenc Puskas record goal 84 a lehpel a. Ram tana goal khung tam ber record neitu erawh Iran striker hlui Ali Daei a ni a, ani hian goal 109 tehmeuh a khung avangin kum 33 mi Ronaldo tan khum a harsa tawh ang.

Danglamna Ronaldo

Cristiano Ronaldo-a'n goal khung turin minute li chiah a mamawh. Portugal-in corner an hmu a, Joao Moutinho ball vawrh luh chu Ronaldo hian a tauh lut nghal a, Portugal captain hi Morocco player inkara rawn put chhuakin huaisen takin boot leng vel karah a tauh lut.

Goal an phurh hnuah Morocco an harh nghal, mawi taka ball inpe kualin an thawkrim a, tharum an hmang nasa bawk. Mahse, Iran nen an inkhelh ṭum ang bawkin an hun ṭha neih chu an khawhral zel, midfielder Hakim Ziyech-a'n yard 25 vel aṭanga a pet chu keeper Rui Patricio tan fiahna a tling a, striker Khalid Boutaib erawhin goal zawnah a pet thei lo.

Morocco an vanduai

Second half-ah pawh si phur zawk Morocco bawk an hlauhawm. Ziyach-a freekick pet chu midfielder Younes Belhanda-a'n tauh chawngin goal ngei tura ngaih ni mah se Patricio-a'n ropui takin a dan sak. Premier League club Wolves keeper thar chet dan hi 1970-a Pele ball tauh ṭha taka dangtu English keeper Gordon Banks dan sak dan nena khaikhin tlak a ni.

Morocco-in point an hlawh­chhuah loh chuan an tla dawn tih an hria a, an goal bawh a nat phah sawt bawk. Atlas Lions tan ball pet thiam Hakim Ziyech a hlauh­awm a, AFC Ajax midfielder freekick pet chu Medhi Benatia-a'n goal zawnah a tauh thei lo.

Kum 25 mi Ziyech a hlauh­awm zel a, veteran defender Pepe-a'n a goal khung tur a dan sak ṭha hle. Minute nga pekbelh a ni a, Portugal an talbuai tawh a, freekick aṭanga ball lut chu box chungah Benatia zawnah tak a tla a, Morocco captain hian yard 12 lek aṭangin a pet over. European champion an vannei a, point thum an hlawh chhuak a, Atlas Lion tan erawh beisei tur a awm tawh lo.



Share this Post

Login to comment
No Comments