Arsenal keeper thar Bernd Leno

Arsenal chuan Bayer Leverkusen aṭangin goalkeeper Bernd Leno an lalut. Germany international la chhuak turin Gunners hian pound maktaduai 19.3 an hmang a, a contract rei zawng erawh 'hun rei tak chhung' tih bakin tarlan a ni lo.

Kum 26 mi Leno hian season sarih chhungin Bayer Leverkusen tan inelna hrang hrangah match 304 a khel hman a, ram tan vawi riat inlan ve tawh mah se Russia World Cup-ah erawh hruai a ni ve lo thung.

Arsenal manager Unai Emery chuan, "Bernd hi goalkeeper theihna nei sang leh tawnhriat ngah tak a ni a, tun hnai season sarih chhung chu ṭha takin a khel tawh a ni," tiin a sawi. Gunners keeper neih sa Petr Cech leh David Ospina te tan thu ngaihthlak nuam a ni kher lo ang, khelhna hmun chang turin thawhrim a ngai dawn.

2011 Champions League-ah khan Leno hian kum 19 mi chauh ni chungin Chelsea a hmachhawn a, European club liante inelna sang bera inlan thei goalkeeper naupang ber a ni. 2016 khan ram tan khel ṭanin nikum khan an ram hi Confederations Cup a lakpui.

Germany-in World Cup qualifier-a an match hnuhnung bera Azerbaijan an hmachhawn ṭum pawhin Leno hian a khel a, mahse coach Joachim Low-a'n Manuel Neuer leh Marc ter Stegen te chunga rinna a nghah zawk avangin atan Russia pan ve theih a ni lo.

Arsene Wenger thlaktu Emery-a'n tlarhnung remphui a tum tih a chiang a, keeper Leno a lakluh hma hian defender Stephan Lichtsteiner chu Italian champion Juventus aṭangin a la tawh bawk. Borussia Dortmund defender Sokratis Papastathopoulos pawh an lalut hnai tawh hle bawk.

Player thar vanga chanchin lawmawm an neih rualin, Arsenal midfielder Jack Wilshere erawhin June thla tawp ruala a contract zo tur a hman zawh rualin Emirates Stadium a chuahsan tur thu a tichiang ve thung.

Arsenal aṭanga inzir chhuak, kum 26 mi Wilshere chuan, "Arsenal hi kum 17 chhung ka chenchilh tawh a, he hmuna awm chhunzawm zel pawh hi ka duhdan a ni. Mahse, Emery nen kan inbiak hnuah beiseina thar awm chuang loin khelmual chhungah hmun chan tam a beisei ngam loh," tiin a chhuah tur thu a sawi.



Share this Post

Login to comment
No Comments