Russia-ah Teranga Lions an lam

Africa ram zinga FIFA World Cup 2018-a chak hmasa ber chu Senegal an ni a, Thawhlehni zan khan Poland 2-1 in an hneh.

Group H-ah Poland leh Colombia te chu knockout stage lut thei tura beiseiawm an ni a, FIFA ranking-ah pawh 8-na leh 16-na an ni a. Amaherawhchu, heng ram pahnih hi ranking-a hniam zawk Senegal (27) leh Japan (61) lakah an tlawm.

Teranga Lions an hrang

Spartak Stadium-ah Se­ne­gal leh Poland ten nung takin an khel a, Robert Le­wan­dowski awmna team chu rinkai zawk ni mah se an chungnung bik lo.

Minute 37-naah Torino forward Mbaye Niang chuan a tharum hmang ṭangkaiin Polish defender Lukasz Piszczek chu mual vei lamah awlsam takin a paltlang a, Sadio Mane hnenah ball pein Liverpool forward hian Idrissa Gueye hnenah a pe leh a, Everton midfielder Gueye ball pet chu Poland defender Thiago Cionek-a'n an lamah a dang lut.

Second half-ah Poland-in siphurh sut tum mah se Senegal-in hma an hruai nawn a, a goal dan erawhin sawi zui a hlawh. Midfield

aṭanga Grzegorz Krychowiak backpass chu inhliam vanga pawna enkawl Niang chuan ang fuhin keeper Wojciech Szczesny leh defender Jan Bednarek aiin ball a nang fuh hmasa a, Senegal forward hian goal ruakah ram tana a goal hmasa ber khungin man of the match-ah thlan a ni zui bawk.

Poland tan minute 86-naah Krychowiak chuan mawi zetin a tauh lut a, amaherawhchu siphurh sut nan hun a tlai tawh. Inkhelh ṭan hmaa hming langsar Senegal forward Mane chu ven uluk a nih avangin a che hleithei lo a, Poland captain Lewandowski pawh defender lian pahnih Salif Sane leh Kalidou Koulibaly te venna hnuaiah a che thei bik lo.

Teranga Lions an lam

Senegal hian kum 2002 khan a vawi khat nan World Cup an khel a, an match hmasa berah champion lai France hnehin tun thlengin an lar pui. Tun ṭuma coach Aliou Cisse hi kum 2002-a captain kha a ni a, inkhelh banah Senegal player anmahni ṭantu mipui hmaah an lam leh a, group stage-ah tawp mai an tum lo tih a lang.

Kum 42 mi Cisse chuan, "Kan zir angin kan khel a, kan theihna zawng zawngin kan khel bawk. Kan chak avangin kan bul ṭan dan hi duhthusam a ni a, amaherawhchu Japan kan la hmachhawn dawn avangin thil dang ngaihtuah hman kan ni lo," tiin a sawi.

Poland striker Arkadiusz Milik chuan, "Kan khel chhe takzet. Senegal-in bang an siam a, kan zuan khum thei lo. Colombia nen kan inhmachhuan dawn a, lungngai hman kan ni lo," tiin an khelh chhiat thu a sawi.

Pathianni zan dar 11:30-ah point la hmu lo pahnih Poland leh Colombia an inkhel ang a, hemi hma dar­kar thumah point thum hmu tawh pahnih Japan leh Sene­gal te an inkhel bawk ang.



Share this Post

Login to comment
No Comments