Haw kan la duh lo – Mooy

Australia-in kumin FIFA World Cup-a an match hmasa berah hmuhnawm takin an khel a, amaherawhchu champion rinkai France lakah a pawimawh ber point an hlawh chhuak lo. Socceroos hian vawiin tlai dar 5:30-ah Denmark an hmachhawn dawn a, an chak lo a nih chuan second round luh a beiseiawm tawh lo ang.

Huddersfield Town midfielder Aaron Mooy chuan, "Chak chu kan tum a, amaherawhchu game plan nghet kan nei a, kan thlak danglam tam dawn lo a, kan hna ṭha zawka thawh erawh a ṭul dawn a ni. Match tin hi final ang mai a ni a, haw kan la duh lo," tiin a sawi. Australia team hi Bert van Marwijk-a'n a enkawl a, ani hian Feyenoord, Borussia Dortmund leh Netherlands te pawh a enkawl tawh.

Dutch manager hian amah pui turin Mark van Bommel te a hmang a, Mooy chuan Barcelona leh Bayern Munich midfielder hlui aṭanga a hriat belh hnem thu a sawi a. France laka khel ṭha zet defender Trent Sainsbury chuan, "France laka kan chak loh vang khan kan hnual lo a, kan khelh dan khan minti phur a, group match hnuhnung bera Peru kan hmachhawn thlengin a la danglam lo ang," tiin a sawi ve bawk.

Denmark erawh Peru lakah khel ṭha tawk lo mah se hnehna an chang thung a, an player neih dan thlirin zanin hi knockout stage kawng zawh theihna hun ṭhaah a ngaih theih.

Danish Dynamite hian Spurs midfielder Christian Eriksen leh Chelsea defender Andreas Christensen te an kawl a, keeper hi Euro 1992-a an ram champion puitu Peter Schmeichel fapa Kasper Schmeichel a ni bawk.

Manchester United keeper hlui Peter khan kum 1995 khan minute 470 chhung goal chhuah loin a kaltluang a, Kasper hian kum 2017 aṭangin tun thlengin (minute 534) goal chhuah loin a kaltluang a, record kawltu a ni.



Share this Post

Login to comment
No Comments