ATK leh Bengaluru-in coach thar nei

Indian Super League club ATK leh Bengaluru chuan tun hnaiah season thar atana an coach tur an puang a, Kolkata club ATK-in Steve Coppell an lakluh laiin Bengaluru chuan Carles Cuadrat an ruat thung.

ATK hian season hmasa khan an manager turin Teddy Sheringham an lalut a, mahse Manchester United striker hlui hian beisei ang result a neihpui theih loh hnuah technical director Ashley Westwood chuan a enkawl lailawk.

Bengaluru boss hlui Westwood hi a bang ve leh a, Robbie Keane chuan season tawp lamah player-manager dinhmun a chelh hial a ngai a ni. England international hlui Coppell hi Indian Super League-ah a mikhual hran lo a, Kerala Blasters leh Jamshedpur FC a enkawl tawh.

Hetihlai hian Bengaluru FC chuan an coach thar tura Carles Cuadrat an lakluh thu an lo puang daih tawh bawk. Carles hi Bengaluru coach chhuak ta Albert Roca assistant kha a ni a, hmun danga Roca zui zel aiin Bengaluru-a mawhphurhna lak a thlang ta a ni.



Share this Post

Login to comment
No Comments