Salah telna Egypt hnehtu Russia

World Cup 2018 thlengtu Russia-in mikhual lakah ṭhat chhuah an tum lo - Thawhlehni zan khan Mohamed Salah telna Egypt chu 3-1 in an hneh a, an ke lehlamin last 16 an rap tawh.

Nizan khan Group H inkhel dangah Uruguay leh Saudi Arabia an inkhel a, Uruguay-in hnehna an chang a nih chuan inelna thlengtu leh South American team hian last 16 an lut ang - he thuziak i chhiar meuh chuan engkim a chiang tawh dawn tihna a ni.

Russia tan Denis Cheryshev leh Artem Dzyuba ten goal khat ve ve an khung a, Egypt captain Ahmed Fathi chuan an lamah a ti lut bawk. African team tan Salah-a'n penalty hmangin goal khung ve mah se Egypt harhna thlen turin a tling tawk lo.

Fak phu Russia

Inelna thlengtu an nih avangin Russia-in World Cup an khel a, ram 32 inlana zinga ranking hniam ber (70-na) nichungin World Cup an hmachhawn a, inelna thlengtu laka mipui beisei san loh ber 

ṭum a ni.

Mahse, Russia-in an match hmasa berah inkhel hmuhnawm pholang nghalin Saudi Arabia chu 5-0 ngawtin an sawp a, Egypt lakah pawh first half-ah goal khung lo mah se second half an khel erawh a hmuhnawm hle.

Hetihrual hian Russia hian an goal hmasa ber khung tur erawhin vanneihna an mamawh - Egypt goalkeeper Mohamed El-Shenawy chuan 

Aleksandr Golovin ball cross awlsam taka man theih nia lang chu a hnek chhuak a, hei hi Roman Zobnin chuan pet letin Artem Dzyuba a venna lama a 'balance' hloh Egypt captain Ahmed Fathi chuan an lamah a ti lut.

Minute 52-naa Denis Cheryshev goal khungah erawh vanneihna a tel tawh lo a, team goal dik tak a ni - Cheryshev hian tun inelnaah goal thum a khungna chiah a ni. Minute 62-naa Dzyuba goal khungah pawh 'class' kan hmu a, kum 29 mi striker hian a awma ball a lak thlak hnuah ṭha zetin a khung.

Salah a tawk lo

Champions League final-ah a inhliam avangin Mohamed Salah-a'n Egypt tan match hmasa ber a khel thei lo a, an thiampuipa tel loin Uruguay lakah 0-1 in an tlawm. 100% in Salah la in fit lo mah se Russia lakah erawh inkhel bul ṭantir a ni.

Egypt-in last 16 lut turin chak ngei an mamawh tih an inhre bawk a, Salah a awm tawh bawk avangin an inringtawk sawt. Mahse, season hman zawh taka Reds tana goal 44 khungtu hian 0-0 a nih laiin goal khungna chance a neihah a khung lo a, second half ṭantira an chetsual chu an tuar chhunzawm niin a lang bawk.

Salah hi minute 73-naah tih tluk a ni a, VAR rawn a nih hnuah penalty pek niin goal-ah a chantir. Mahse, Salah hian  Liverpool-ah chuan Roberto Firmino leh Sadio Mane a nei a, Egypt-ah chuan amah thlawptu a nei ṭha tawk lo a, an fight let thei lo.

Egypt coach Hector Cuper chuan, "Salah hian a hliam avangin kan zingah training pawh a nei mumal thei lo a, a rang thei ang bera chhawr kan duh bawk si avangin amahin training a nei tam zawk. Uruguay lakah Salah kan nei lo a, vawiinah nei tawh mah ila kan tan a tawk si lo," a ti.

Hello Sir Putin!

Russia-in an match hmasa berah 5-0 ngawtin Saudi Arabia an sawp a, Russia manager Stanislav Cherchesov chuan inkhelh zawha news conference a neih laiin Russia president Vladimir Putin hnen 

aṭangin phone call a dawng hial!

Putin hian Cherchesov chu Russia khelh dan avangin lawmthu a hrilh a, player-te a lawmpui thu lo hrilh chhawng turin a ti. Russia an chawl lo, Saudi aia team ṭha zawk Egypt chu 3-1 ngawtin an hneh leh ta a, a ram pum lamin an lam!

Russia hian match hnih an khelh tawh aṭangin goal riat an khung a, goal khat chiah an la chhuah - kum 1966 (Soviet Union angin an la khel) hnua Russia-in World Cup-a an match hmasa pahniha hnehna an chan leh hmasak ber a ni.

Russia coach Stanislav Cherchesov, "Vawi hnih hnehna chan hi tihpalh thil thua thleng a ni lo a, team inlungrual tak kan ni," tiin an thawhhona ṭha chu an chakna hnar a nih thu a sawi.



Share this Post

Login to comment
No Comments