Aizawl FC tan Bagan dan theih an ni em?

Niminah Mohun Bagan-in Aizawl an lo thleng tawh a, I League nomawi inchuhin Aizawl FC nen April 22 hian RG Stadium, Mualpuiah an inhmachhawn dawn.

Aizawl FC hian Mohun Bagan hi goal hnih china an hneh chuan Mizoramah ngei an champion dawn tihna a ni a, goal khata an hneh chuan nomawi chawi turin match hnuhnung bera Shillong Lajong draw a tawk thung.

Mizo club hi Inrinnia an inkhelh hunah an chak lo a nih erawh chuan Mohun Bagan hi pakhatna an ni dawn. An inhnehtawk a nih pawhin Mizo club tan an kutah champion leh champion loh a awm tawh lo a, Mariners-in an match hnuhnung bera Chennai City an hneh chuan Kolkata club an champion zui ang - engtinnge Mizo club hian Mohun Bagan an hneh theih ang? tih hi zawhna awm chu a ni.

Thlir kir ila

Season hmasaah Aizawl FC-in I League-a an match hmasa ber Mohun Bagan khelmualah an khel a, 3-1 in an tlawm. RG Stadium-ah erawh Mizo club-in phuba lain 2-1 in hnehna an chang a, Federation Cup final-ah Bagan hian 5-0 in Aizawl FC hi an sawp thung. Hriat reng tur erawh season hmasa AFC leh Bagan hi an danglam nasa tawh tih hi a ni.

Kumina team pahnih intawn hmasakah club pahnihin I League-a match hmuhnawm ber ang hiala sawi theih pho chhuak chungin Mohun Bagan 3-2 in an chak. He inkhelah hian Bagan-in 4-4-2 formation an hmang a, Debjit Majumder chuan si ban nghakin tlarhnungah  Pritam Kotal, Anas Edathodika, Kinshuk Debnath leh Subhasish Bose te an inkawp a, Prabir Das, Sehnaj Singh, Bikramjit Singh leh Katsumi Yusa ten midfield luahlumin tlarhmaah Jeje Lalpekhlua leh Darryl Duffy an inkawp.

A danglam dawn

Mohun Bagan coach Sanjoy Sen-a'n 4-2-3-1, 4-4-1-1 leh 4-4-2 formation a hmang nasa a, Aizawl FC nen an inkhelh hmasaka player aṭangin inkhel tur a siksawi nual a rinawm. Kum 56-a upa coach hian Mizo club an hmachhawn hmaa an match hnuhnung berah Duffy leh Sony Norde chu bench-ah takngial pawh a dah lo a, I League champion duh vangin a hahchawlhtirah a ngaih theih. 

Sanjoy Sen hian an intawn hmasak ṭuma a formation hman 4-4-2 bawk a hman rin a ni a, tlarhnung laiah Anas Edathodika leh Eduardo Ferreira inkawpin right back Pritam Kotal leh mual vei lam sirah Subhasish Bose te goal lut tur venghim tura an din a rinawm. Inkhel hmasa zawka midfield-a inlan Prabir Das leh Bikramjit Singh ten hmun an chan chhunzawm a rinawm loh. 

Wing aṭangin captain Katsumi Yusa leh Sony Norde chu goal nawr tura ngaih an ni a, midfield laiah Sehnaj Singh leh Souvik Chakraborty an inkawp rin a ni a, Bagan midfield dang chat turin Mahmoud Amna, Jayesh Rane leh Alfred Jaryan te an pawimawh dawn. Bagan tan tlarhmaah Jeje Lalpekhlua leh Duffy inkawp tura beisei an ni - hriatreng tur erawh Sanjoy Sen hi rin loh taka team siksawi ching a ni a, Jeje aia Balwant emaw rawlthar Azharuddin Mallick ten inkhel bul an ṭan pawhin a mak lo ang.

Bagan chakna tlarhnung

Mohun Bagan chakna hnar sawi ni dawn se tlarhmaa an hlawh tam rual players ai mah chuan tlarhnung lamin lam an hlawh zawk ang. Kolkata club hian league match 16 an khelh tawhah goal 10 chiah an la chhuah a, match khata goal 0.6 zel chhuah ang an ni a, I League-ah goal chhuah tlem ber an ni mek .

Aizawl FC tan tlarhmaah goal sarih khung tawhtu Kamo Stephane Bayi pawimawhna a zual dawn a, mual vei lam sirah Brandon VL Remdika leh R. Laldanmawia pawimawhna a zual sawt ang - hei erawh theihnghilh loh a ṭha, Mizo club hian Bagan mualah goal hnih an khung thei.

Fantastic Four

Mohun Bagan-in tlarhmaah Norde, Jeje, Duffy leh Katsumi an nei a, anni pali inkawp aia ṭha thlan tur nise Indian football-ah kher chuan thlan tur an tam bik lo. Haitian winger Norde tlan chakna hi Bagan innghah nan hman an tum leh dawn a, ball a thiam tel bawk avangin AFC player-in an 'bawr bik' ang a, mipui mit fukna a ni bawk ang. Duffy-a'n Aizawl vawi thum a hmachhawn tawhah goal thum a khung a, Jeje-a'n vawi hnih a hmachhawn tawhah vawi thum a pet goal bawk.

Goal sarih khung tawh Duffy leh goal nga khung tawh Jeje nen an khelh dan in ang, 'a hmunah tak a hunah tak' tia an sawi ṭhin striker an ni a, chance ṭha pek loh an him ber! Duffy hi ball thiam tia sawi tur ni lo mah se ball kangah a hlauhawm a, Jeje-a hmun awl insiam thiam leh tharum ngah zia lah sawi hmaih theih a ni lo - striker pahnih hi an inkawp a nih ngat chuan Aizawl FC tan set piece a tlem thei ang ber nei tura inzirtir a fuh ang.

Sanjoy vs Khalid

I League tawnhriat ngah lamah kum upa zawk Sanjoy Sen aiin Khalid Jamil-a chungnung zawk a, nomawi chawi lamah erawh Bagan coach hi hmai uang thei zawk tur a ni. United SC boss hlui Sanjoy hi Bagan-in an lakluh tirhin season khat pawh daih lo tura ngaih ni mah se a season hmasa berah league nomawi a chawipui nghal a, a season hnihnaah Federation Cup nomawi a chawi bawk. Sen hi coach 'tactical' tak nia sawi ni ngai lo mah se player-te a fuih thiam leh tiphur thiam ni a sawi a ni a, Bagan player ten phur takin Aizawl an rawn pan dawn tihna a ni.

Aizawl FC coach Khalid Jamil-a'n I League match-ah a formation 4-2-3-1 a la thlak miah lo a, Mumbai FC coach hlui hian fak a phu em em na chu a naute an tihturah an chiang em em ṭhin hi a ni. An club hmachhawn tur a zira players siksawi leh game thlir dan thiam a ni a, boruak sang tak hnuaiah pawh 'cool' taka naute kaihhruai thiam leh pressure insiam belh lo tura ṭawng fimkhur em em reng a ni. Kum 39-a upa coach hian Inrinniah Aizawl FC hi hnehna hlado a chhampui a nih pawhin mak ti suh.



Share this Post

Login to comment
No Comments