AFC Cup-ah Bagan chak lo

Nilaini zan khan Mohun Bagan chuan AFC Cup group stage-ah  Maziya S&RC an mikhual a, Maldives club ṭha lakah 1-0 a an tlawm avangin group-ah pahnihna aṭangin pathumna an tla thla.

Mohun Bagan coach Sanjoy Sen-a'n a player rem danah I League nomawi chawi a duh tih a chiang a, kartawpa Aizawl FC nen an inkhel tur thlir ran chunga squad remin Mizo tlangval Jeje Lalpekhlua leh Balwant Singh chu regular player zinga inkhel bul ṭantu awmchhun an ni.

Rabindra Sarobar Stadium, Kolkata khawpuia inkhela goal awmchhun lut hi minute 34-naa Mohamed Umair khung a ni a, Bagan-in a chhanletna an nei thei lo. Kolkata club tana chance ṭha bera chhal ngam chu Balwant Singh-a'n goal-ah a chantir thei lo a, second half-a tlanluhtir Katsumi Yusa-a'n a ṭhiante tan goal khungna hun ṭha siam nual mah se Balwant leh Prabir Das ten an khawhral bawk.

Mizo tlangval Jeje-a'n AFC Cup-a goal 10 a khung tawh belhchhah turin minute 90 hun nei mah se goal a khung thei bik lo a, hun tawp nan minute li chiah a awm tawh tiha Serbian defender Milos Kovacevic hnawhchhuah a ni chungin Bagan-in su phurh an sut thei lo a, an mualah an tlawm.



Share this Post

Login to comment
No Comments