PFA team of the year Chelsea leh Spurs in thawh hnem

Professional Footballers' Association Premier League team of the year chu nimin khan puan a ni a, nomawi chawi tura inum Chelsea leh Tottenham Hotspur ten player pali ve ve neiin an thawh hnem ber. London club pahnih bakah hian Liverpool, Manchester United leh Everton ten player pakhat ṭheuh an thawh bawk.

Chelsea-in defender Gary Cahill leh David Luiz bakah midfielder pahnih N'Golo Kante leh Eden Hazard an thawh a, Spurs-in defender Kyle Walker leh Danny Rose, midfielder Dele Alli leh forward Harry Kane an thawh thung. 

Liverpool forward Sadio Mane-a'n hliam vangin tun season-ah a hmel lan tawh dawn lo mah se team of the year-ah a hming a lang tho a, United-in an keeper chhuanvawr David De Gea thawhin Everton innghahna Romelu Lukaku a lang bawk.

April 23-ah PFA awards semchhuah a ni dawn a, chawimawina ngaihhlut hlawh tak PFA player of the year leh PFA young player of the year chawimawina dawng thei tur hming pawh chhawpchhuah tawh niin Kane leh Lukaku chu chawimawina pahnih dawng kawp thei dinhmunah an ding mek.

PFA Players' player of the year award dawng thei tur hian Kane leh Lukaku bakah Manchester United striker Zlatan Ibrahimovic, Arsenal forward Alexis Sanchez, Chelsea winger Eden Hazard leh midfielder N'Golo Kante te hming chhawp chhuah a ni.

Premier League-a player naupang ṭha ber dinhmun luah turin Kane leh Lukaku chu hming langsar ber an ni a, Burnley defender Michael Keane, Manchester City forward Leroy Sane leh Sunderland goalkeeper Jordan Pickford-te an tel bawk.

PFA young player of the year chawimawina dawng turin player chu season ṭan hma khan kum 23 aia naupang an ni tur a ni tih a ni a, Keane hi kum 24-a upa ni tawh mah se season ṭan hmaa 23 ala pelh hman loh avangin a hming chhawpchhuah a ni. Kane, Lukaku leh Pickford te hi kum 23-a upa vek niin a naupang ber Sane chu kum 21-a upa a ni thung.



Share this Post

Login to comment
No Comments