Monaco tan Mbappe bawk

Kylian Mbappe, Radamel Falcao leh Valere Germain te goal hmangin AS Monaco chuan an mikhual Borussia Dortmund 3-1 in an hneh. French club hian kum 2004 hnua a vawi khat nan Champions League semifinal an khel leh dawn. Ligue 1 hmahruaitu hian German-a first leg an khelh ṭumin 3-2 in hnehna an chang tawh, inkhel pahnih belhkhawmah 6-3 in an tlang. 

Stade Louis II-ah minute thumna lekah rawlthar duhawm Mbappe hmanga goal hmahruai an khung nghal. Kum 18-a upa Mbappe hi Champions League knock out stage match li khelh hmasaka goal khung vek thei awmchhhun an ni ta.

Leonardo Jardim-a enkawl Monaco hian an mikhual lakah ṭhat an chhuah lo hle, minute 17-naah Radamel Falcao hmangin an goal hnihna an khung. Benjamin Mendy leh Thomas Lemar ten Dortmund goalkeeper Roman Burki tan hna hautak an siamsak bawk.

Dortmund beiseina siam thar turin Marco Reus chuan Ousmane Dembele thawhrah sengin second half minute thumna lekah an si phurh a sut ṭhen. Club top scorer nilai Pierre-Emerick Aubameyang a hriam tawk lo a, an mamawh zat goal an khung belh thei lo. 

Substitute Germain-a'n khelmual a luh aṭanga second 22 hnu lekah Monaco goal thumna khungin, minute kua khelh hmabak la awmah Dortmund beiseina a tawp tawh. Thomas Tuchel-a'n an bus beih an tawh hnuah a player ten ngai an awh tawh tih sawi mah se tunhma lama an game an la pak lo hle.

Monaco manager Jardim chuan, "Team pahnih kan khelh ṭhat em avangin goal tam zawk lut thei a ni. Ka naute thisenah hian goal khung hnem duhna a bet tlat tawh," tiin atttacking game khelh nuam an tih thu a sawi. Monaco hian league match 32 khelh aṭangin goal 90 an khung tling tawh.



Share this Post

Login to comment
No Comments