Golden State an chak nawn

NBA Playoffs Game 2-ah Golden State Warriors chuan Portland Trail Blazers 110-81 in an hneh a, series-ah 2-0 in hma an hruai. Pathianni zing dar 8:00 khian Moda Center-ah Game 3 an khel ang.

Nimin zing inkhelah Warriors hian an match hmasa zawka point score hnem ber Kevin Durant chu a chawn hliam vangin a chhawr thei lo. NBA Most Valuable Player Stephen Curry an neih avangin buaina tur an nei lo thung, American guard hian court chhungah minute 30 hun a hman chhungin point 19 a score.

Draymond Green-a'n a zawna match hnih nan triple double a nei teuh hle - Green hian rebounds vawi 12 a la a, assists 10 neiin point ruk a score bawk. Klay Thompson (16 points), JaVale McGee (15) leh Ian Clark (13) te an khel ṭha hle bawk.

Golden State hian Game 1-ah khan point 10 chuanga hma hruai fal turin minute 40 zet an nghah a ngai a, an intawn vawi hnihnaah erawh quarter hmasa berah point 16 zeta hma hruai fal nghalin a tawp thlengin an buai lo.

Inkhel dangah Washington Wizards chuan 2-0 a an hmahruaina ni turin Atlanta Hawks chu 109-101 in an hneh. Wizards tan hian Bradley Beal chuan point 31 a score zinga 16 zet chu quarter hnuhnung bera a score niin a team a chakpui.

Western Conference playoff dangah Russell Westbrook chuan point 51 zet score mah se Oklahoma City Thunder chu hnehna a chanpui zo lo. Game 1 a hnehna changtu Houston Rockets bawkin 115-111 in hnehna an chang.

MVP tura rinkai Westbrook-a'n point 51 a score bakah assists 13 leh rebounds 10 neiin a mimal career-a a vawi ruk nan playoff-ah triple double a nei, mah se a ṭhianten an thlawp ṭhat loh avangin a tlawm zawkah an ṭang.

Kum 28-a upa Westbrook-a'n Rockets laka triple double a neih hi playoff bika score hnem ber record thar a ni. American point guard hian regular sason-ah khan triple double vawi 42 neiin NBA record thar a lo siam tawh bawk.



Share this Post

Login to comment
No Comments