Murray leh Nadal an chak

Monte Carlo Masters khelh mekah Nilani zan khan Andy Murray leh Rafel Nadal te chuan hnehna an chang, world number 2 Novak Djokovic pawhin a match hmasa berah hnehna a lo chang tawh bawk.

World number 1 Murray-a'n Gilles Muller lakah a service hmasa ber hloh nghal mah se Braitain tlangval hi insiamṭha zui nghalin 7-5, 7-5 in hnehna a chang.

Kum 29-a upa Murray hian tun season-ah beisei a la phak lo. Australian Open hnuah March 12 khan Indian Wells aṭanga vuak tlak a ni a, kar hmasa khan Roger Federer nen exhibition match an khelh hnuah tun ṭum hi a inlan lehna hmasa ber a ni.

Grand Slam vawi 14 champion tawh Nadal-a'n last 16 lut turin harsatna a nei lo. Darkar hnih chuang hret an inkhelh hnuah Kyle Edmund chu 6-0, 5-7, 6-3 in a hneh. Nadal hian Monte Carlo nomawi vawi kua a chawi tawh a, a vawi 10 nan chawi a tum mek.



Share this Post

Login to comment
No Comments