BCA an chak vek dawn em?

Zanin hian Mizoram Super League-ah Zarkawt Derby en tur a awm dawn a, Hawla Indoor Stadium-ah hmahruaitu Zarkawt BCA leh table mawngphaha awm Zarkawt Serpents an inhmachhawn ang.

Season liam ta khan Serpents-in BCA an hneh avangin semifinal an lut a, kumina la chak vek BCA erawhin relegation playoff an khelh phah thung. Tun season kalhmang erawh a dang a, Serpents-in match hnih chauh khelh tur an nei tawhah chak an la nei lo.

Zarkawt Serpents manager Michael Lalchhuanawma chuan, "Season tluana vawi khat mah chak neih loh hi kan duh lo a, kan match hmabak pahnih hi theihtawp chhuahin kan khel ang," tiin Vanglaini a hrilh.

Serpents enkawltute hian chhuanlam siam lo mah se tun season-a an chet chhiat chhan hi player inhliam an ngah vang niin a lang. Captain Hmingthanmawia chu inhliam vangin a inlan theih a beiseiawm tawh lo a, player pawimawh Robert Lalfakzuala, K. Lalhruaitluanga leh Kanipi Shiv Kumar te an dam chiang lo bawk.

Zarkawt club pahniha che ṭha zawk BCA tana thu lawmawm loh awmchhun chu state pawn player Amritpal leh Yadwinder Singh te an inlan thei dawn lo. Amaherawhchu BCA hian Mizo hlangin an match hmasa berah Tuikual South 89-87 in an hneh a, Mizo hlang pawhin league stage khar se an ngaihtuahawm loh.

BCA-in pakhatna dinhmun an luah theih chhan hi Mizo player-te niin Zonunsanga, Dennis Lalmuanpuia, Henry Lalramngaihawma leh Mathew Remtluanga Sailo te an che ṭha ṭhin a, state pawn player tel lo pawhin an hmuhnawm tho ang. Coach Lalruatfela chuan, "Mipui ṭawiawmna ṭha kan beisei leh a, anni hi kan player 6-na te an ni. League round-a chak vek hi kan tum a ni," tiin semifinal lut chiang tawh mah se inthlahdah a tum lo.



Share this Post

Login to comment
No Comments