McGregor a pawr leh tawh

UFC champion Conor McGregor chuan khawvel barakhaiha boxer ropui Floyd Mayweather a tukzal tur thu a sawi. Irish fighter McGregor hi division panga champion lo ni tawh Mayweather nen hian boxing ring chhungah inhmachhawn turin an incho tawn fo a, inbiakna kalpui mek a ni.

McGregor chuan, "Floyd hi ka tukzal ang a, nangni ho hian mak tiin min thlir ang. Boxing khawvela mite hian eng thil nge lo thleng dawn an hre lo. Boxing khel tura piang ka ni a, he inelna hi ka thuhnuaiah ka dah thuai ang. Min ring rawh u. Kum 28 chauha upa ka la ni a, ka pian a ṭhain ka inphut mawi em em a, ka kut lek chhuak tin mai hi a hlauhawm em em vek a ni," tiin a ṭawng pawr hle.

Vawi 49 inhnek a hmachhawna tlawm hmel la hmu miah lo Mayweather hian kar hmasa lawk khan McGregor hmachhawn tura boxing ring chhunga a lo kir leh tur thu a sawi tawh a, Irish fighter hi a vaupung chauh tina loa an pahniha an inhmachhawn ngei theih nana hma la turin a hriattir tawh bawk!

Hetihlai hian McGregor-a contract neihna UFC president Dana White chuan kar hmasa vek khan fighter pahnih hi an inhmachhawn lohna tura dal thei thil awma a hriat loh thu a lo sawi ve tawh bawk. Ruahman anga engkim a kaltluang a nih chuan McGregor leh Mayweather-te hi Las Vegas khawpuiah June khian an inhnek rin a ni.



Share this Post

Login to comment
No Comments