Mumbai-in Santosh Kashyap an ban

I League club Mumbai FC chuan an coach Santosh Kashyap an ban a, Royal Wahingdoh coach hlui an banna thu hi club website-ah tarlangin, "Mumbai FC chuan Santosh Kashyap nena kan thawhhona chu tihtawp mai kan rel a, he club tana a thawhrimna leh beihnaah lawmthu kan sawi rualin a hmalam hun atan duhsakna sang ber kan hlan a ni," an ti.

Mumbai FC hian kum kua chhung zet an coach dinhmun lo chelh tawhtu Khalid Jamil an ban hnuah a aiawh turin tawnhriat nei ṭha Kashyap hi an lalut a, season ṭantirah coach ṭawngkam thiam tak hian 'pathumna' aia hniama a club thar chu tawp pui a tum loh thu a sawi. Mohun Bagan coach hlui hian a match hmasa pahnihah Mumbai hi hnehna chanpui nghal mai mah se Bengaluru laka 3-0 ngawta an tlawm hnuah an tho leh tawh lo a, match 12 chhung chu chak hmel an hmu tawh lo. 

Maharashtra club hian khelmual chhung mai piah lamah a pawn thlengin buaina an nei a, fan-ten Kashyap an duh lohna an tlangaupui nasa hle. International break hmaa an match hnuhnung bera DSK Shivajians laka 5-0 ngawta an tlawm ṭum phei chuan Santosh Kashyap hian fan-te chu na takin a sawisel a, tunah erawh amah kaltir a ni ta zawk.

Mumbai FC hian reiloteah Santosh Kashyap thlaktu tur coach an rawih tur thu an sawi a, I League table mawngphah team enkawl tur hian I League-a Salgaocar lo champion pui tawhtu Karim Bencherifa, Mumbai City assistant coach hlui leh Spanish second division club RCD Mallorca-a assistant ni mek Oscar Bruzon, I League-a Mumbai FC hlang kaitu leh Lao Premier League club Lanexang United coach nilai Dave Booth te hming lamrik a ni.



Share this Post

Login to comment
No Comments