Asenal beiseina a thamral mek Wenger hma hun a chiang hnai

Premier League match an khelh hnuhnung pangaah vawi li an chak loh avangin Arsenal tan champion sawi ngam a ni tawh lo! Arsene Wenger-a naute tan season thara Champions League khelh phak pawh beiseina mai a ni rih a, an manager hma hun a la chian theih loh bawk avangin Gunners fan-te lu a hai takzet.

Inrinni zan inkhelah West Brom defender Craig Dawson-a'n goal hnih a tauh luh bakah substitute Hal Robson-Kanu goal hmangin an mikhual Arsenal 3-1 in an hneh. Gunners tan Alexis Sanchez-a'n tun season-a a league goal 18-na khung ve mah se kawngro a su lo.

Champions League aṭanga mualpho taka tla hlim Arsenal hian league-ah point 50 chauh an la hmuh avangin hmahruaitu Chelsea an phak lohna chu point 19 zet a ni tawh. Blues bakah Manchester United, Manchester City, Tottenham leh Liverpool te nen a sang pali zinga awm an inchuh dawn avangin Gunners hmabak hi a awlsam dawn lo hle.

A bilh a tho lo

Arsenal manager Wenger-a'n inkhelh hmain set piece hmangthiam West Brom lakah an inven tur thu a sawi a, a hlawhchham! Goalkeeper Petr Cech chu malpui na vangin minute 38-naah lakchhuah a ni a, ke rek dinglam na vangin(?) an goal neihchhun khungtu Sanchez chu minute 78-ah lakchhuah a ni bawk.

Mikhual Gunners lamin ball possession 77% zet chang mah se an tlarhnung a phui loh bakah an tlarhma an hriam tawk lo. Nacer Chadli leh James McClean te corner pet aṭanga ball lo kal chu Dawson-a'n chiang zetin a tau lut, mimal ven bik nei lo Gunners defender an mualpho.

Chile international Sanchez-a'n midfielder Granit Xhaka hnen aṭanga a ball hmuh chu a awma la thlain tawih zetin a khung ve. Barcelona forward hluiin Arsenal a zawm hnuah inelna hrang hrangah goal 100-ah a inrawlh tawh a, West Brom laka a goal khung danah inrintawkna a nei ngah tih a chiang hle.

Wenger-a'n ven ngai bik tia a sawi Kanu-a'n vengtu a neih loh avangin khelmual luh aṭanga a ball vawi hnih khawihnaah goal a khung nghal. Kanu goal khung kawngah dem tur an zawng a nih chuan awmze nei loa rawn tawlhhma keeper David Ospina chungah mawhphurhna a tla ngei ang.

Fak phu Baggies

West Brom-in an club chanchinah league sang berah point 50 an la hmu tling ngai lo a, Arsenal laka hnehna an chan avang khan league match 29 khelh aṭangin point 43 an hmu; league table-ah pariatna niin tun season-ah a sang pasarih ho laka hnehna an channa hmasa ber a ni.

League match hnih an tlawm hnua chak ni hmel hmu ve leh ta West Brom manager Tony Pulis chuan, "Crystal Palace leh Everton kan hneh loh hnuah ka naute an nguai em em a, vawiinah kha chuan hnehna chang turin theihtawp tak meuh meuh an chhuah a ni. Kan point hmuh zatah kan lawm tawh a, chutihrualin kan la duhtawk lo - a tam thei ang ber hmuh kan tum ang," a ti. Pulis hi English manager zingah Premier League season kal laia a naute thlensan pui ber a ni mek.

Arsenal manager Arsene Wenger chuan, "Premier League-ah chuan hetiang hi a awm ṭhin reng a ni. Kan khingpuite khan tlarhnung an rem phui ṭha a, kan hmalam hun a awlsam tawh dawn lo - City nena kan inkhel tur hi kan tan a pawimawh hle ang," tiin an league match hmasa bera Manchester City an khelh tur chungchang a sawi.

A chiang hnai

West Brom khelmual The Hawthorns chungah Thlawhtheihna hmangin Arsenal manager Arsene Wenger ṭan tu leh amah duh tawh lotu ten thu ziak an tarlang!

'Contract thar a ngai lo, Wenger i chhuah a hun' tih leh 'Wenger i chungah rinnna kan nghat' tih hmuh tur a awm. Khelmual chhunga fans tam takin an manager chhuak tawh tura an duhzia lanna banner an keng bawk.

Premier League manager ṭanglai zinga mahni hna ngai chelh rei ber Wenger hian tun season tawp thleng bak contract a nei tawh lo a, a hma hun tur an inrinsiak mek.

Kum 67-a upa Wenger chuan, "Ka hma huna ka tih tur chu ka hria, nangni pawhin in hre thuai ang," tiin a hma hun a tihchian hnaih thu a sawi. Wenger hian a hma lam hun ai chuan hnehna an chan theih dan tur chu a pawimawh zawk thu a sawi tel bawk.

Sanchez chungchang zawhna chhanginWenger chuan, "Hliam a neih avangin second half kha khel lo tawp tur zawk a ni a, ani hi chu inkhelh reng duh chi a nih avangin a lut tlang zawk. A hliam hi a satliah deuh a nih chuan ram tan a khel zui ang a, a hliam na a nih chuan a khel lo ang," a ti.

Arsenal hian April 2-ah Manchester City an hmachhawn dawn a, tunkar tawp hian international match khelh tur niin Sanchez pawh Argentina leh Venezuela hmachhawn tur Chile squad-ah telh a ni.



Share this Post

Login to comment
No Comments