MSL3 a hmuhnawm dawn Mizoram-ah India player ṭha rual

Mizoram Super League Season 3-a inlan turin India national basketball team-a player pawimawh ni pha panga an inlan dawn tih a chiang tawh a, kum dang zawng aiin Mizoram chhunga basketball inelna sang ber hi a hmuhnawm ang.

Mizoram chhunga basektball inelna sang bera player langsar inlan turte chu India captain Amritpal Singh bakah ram tana a khelhpui Vishesh Bhriguvanshi, Gurvinder Singh Gill, Yadwinder Singh, leh Amjyot Singh te an ni.

TBL an ṭha reng

Khatla TBL-in MSL hnuhnung bera player hmuhnawm ber Vishesh Bhriguvanshi an chelh a, feet ruka sang Pratham Singh aia an lakluh Garry Gill (Gurvinder Singh) chu feet ruk leh inches sarih zeta sang a ni. India rama point guard ṭha ber ang hiala chhal theih Vishesh-a'n ram tana a khelhpui Garry a chawm dawn a, hei ringawt pawh hi en loh phal chi a ni lo.

Khatla TBL manager Lalawmpuia Pachuau chuan, "ONGC-in Federation Cup an khelh avangin Vishesh hi match hmasa pahnihah kan chhawr theih kan beisei lo. 

Mizoram chhunga basketball inelna sang ber hi March 21, Thawhlehni zanah khelh ṭan a ni dawn. Champion lai Khatla TBL-in kai thar Chanmari Hollow BBSP an hmachhawn nghal ang. Garry Gill erawh kan match hmasa berah a inlan hman kan beisei a, tunah erawh Aizawl a rawn la thleng lo," tiin Vanglaini palai a hrilh.

MSL hmasa pahniha champion Khatla TBL-in match hmasa berah kai thar Chanmari Hollow BBSP chu March 21, Thawhlehni zanah an hmachhawn ang.

BCA ṭha zawk

Zarkawt BCA-in MSL hmasa ber final-ah Khatla TBL an hneh lo a, MSL2-ah relegation playoff khelh ngai khawpin an khel ṭha lo. Tualchhung basketball TBL elpha bera ngaih Zarkawt BCA hian an tihsual aṭangin an zir a, state pawn player neih loh pawi zia an hre tawh.

MSL3 khel turin Zarkawt BCA hian India captain Amritpal Singh leh inkhel bul ṭan pha small forward Yadwinder Singh te an lalut. India captain Amritpal hi Japan B-League club Tokyo Excellence tan a khel tawh ṭhin a, tunah chuan ONGC tan a khel leh tawh. Punjabi tlangval hi feet ruk leh inches kuaa sang niin India rama centre ṭha ber anga chhal theih a ni. 

Player pakhat zawk Yadwinder hi ONGC-ah Amritpal leh TBL lakluh Vishesh te nen an khel ho a, feet ruk leh inches ngaa sang basketball player hi Hawla Indoor Stadium mawitu zingah a tel dawn.

BCA head coach thar Lalruatfela chuan, "ONGC-in Federation Cup an khelh avangin kan hmasa bera Tuikual South kan hmachhawn hunah chuan kan state pawn player-te hi kan chhawr thei dawn lo. Amaherawhchu an rawn awm hunah chuan kan chakna hnar tur an ni," tiin an player-te chu danglamna thlen thei an nih thu a sawi.

Phengphehlep mawi zawk

Tuikual South-in MSL2-ah final a thleng a, Khatla TBL laka an tlawm chhan chu state pawn player an inneih ṭhat hleih vang a ni. Tun season-ah erawh TKS hian Amjyot Singh an lalut a, feet ruk leh inches riata sang Punjabi tlangval hi India captain Amritpal nen Tokyo Excellence tan khel dun tawh a, India player hmabak nei êng te zinga mi a ni ve bawk.

Phengphehlep (TKS sawina) manager Lalremsiama Hrahsel chuan, "Amritpal hian season ṭantirh aṭangin min tel pui theih kan beisei a, kan state pawn player pahnihna erawh puanzar a la remchang lo," tiin Vanglaini palai a hrilh.

Tuikual South hian an match hmasa berah champion tuma inla ṭha Zarkawt BCA nen March 23, Ningani zanah an inkhel dawn a, BCA-in an state pawn player an neih loh laia Phengphehlep-in Amjyot Singh an chhawr theih chuan Zarkawt hmabak a har khawp ang.

Engtin zel?

MSL club hian state pawn player pahnih ṭheuh an la thei a, league round chhung lak theih a ni. Hei vang hian club-tinin state pawn player lak theihna tur hmun ruak pahnih an dah awl vek.

Basketball-ah hian quarter li a awm a, quarter pakhatah hian state pawn player hi a ruala chhawr theih a ni. Tun dinhmunah Khatla TBL leh Zarkawt BCA chiahin an player pahnih lakluh an nemnghet a, club dang pali aṭangin player hming langsar an awm belh ngei rin a ni.



Share this Post

Login to comment
No Comments