Miami Open khel lo tur Murray

Andy Murray chuan karleh aṭanga khelh tur Miami Open-ah a inlan loh tur thu a sawi. Kumina ATP World Tour Masters 1,000 tournament pahnihna a khelh theih loh tur chhan hi a kiu dinglam hliam a la dam loh vang a ni.

World number 1 Murray-a'n kuminah beisei a la phak lo. Australian Open-a a chak loh hnuah Indian Wells-ah inlan zuiiin second round-ah world number 129 Vasek Pospisil hneh loin a tla.

Kum 29-a upa Murray chuan, "He hmuna ka inkhel thei lo tur hi a pawi ka ti hle. Min ṭantute chungah ngaihdam ka dil a, chutihrualin ka hliam tawrh hi min hriatthiam sak ve pawh ka beisei," a ti. Murray a inlan dawn loh avangin world number 136 Taylor Fritz tan hmunruak a awm thung ang.

Britain tlangval Murray hi April 7 aṭanga France nen an khelh tur Davis Cup quarterfinal-ah chuan inlan thei tura beisei a ni. Tun dinhmunah world number 2 Novak Djokovic pawh dar na vangin a buai mek a, Serbian tlangval hi Miami Open-ah a hmel kan hmuh dawn leh dawn loh a la chiang lo.



Share this Post

Login to comment
No Comments