Foxes an kal zel

Premier League champion Leicester City-in coach thar Craig Shakespeare enkawlna hnuaia an harhtharna chan an chhunzawm zel a, Inrinni zan khan West Ham chu khualmualah 3-2 in an hneh - tun season-a khualmuala hnehna an channa hmasa ber niin tla thei dinhmuna an dinna aṭangin an him zel.

Foxes hian minute sarih chhung lekin goal hnih an khung hman a, Riyad Mahrez leh Robert Huth ten an khung. Awlsam takin Foxes an chak dawn nia a lan hnuah Manuel Lanzini chuan minute 20-naah an si phurh a sut ṭhen. Mahse, Foxes an buai duh lo - Jamie Vardy chuan goal khat a khung ve leh a, second half-a Andre Ayew goal khungin Hammers a chhan zo lo.

Leicester-in match li chhung a zawnin hnehna an chang ta a, Liverpool, Hull City leh Sevilla an hnehna inkhela langsar goalkeeper Kasper Schmeichel chu West Ham lakah pawh chhandamtu a ni - Andy Carroll-a hun ṭha neih vawi hnih chu ṭha zetin a dang a, Ayew chuan goal ruakah a pet lut lo bawk.

Manager thukhawchang

Leicester manager Craig Shakespeare chuan, "Hnehna chang tura tih ngai zawng zawng kan ti vek a, inkhel bul kan ṭan ṭha takzet a ni. West Ham khan fak an phu a, second half-ah an theihna zawng zawng nena an khelh avangin Kasper-a chhanhimna kan mamawh phah a ni. Kan result avang hian ka hlim takzet a ni," a ti.

Claudio Ranieri thachhang dawl ṭhintu Shakespeare hian Premier League-a a match hmasa pathumah Leicester hian goal thum aia tlem lo an la khung vek a, hetiang ti thei manager awmchhun a ni.

West Ham manager Slaven Bilic chuan, "Goal kan khung loh zozai avang khan kan finishing in sawisel a ni mai thei a, mah se Leicester keeper  Kasper Schmeichel kha fak phu ber chu a ni," tiin Kasper chet ṭhat vanga chak loah a inngai.

Swansea ngamtu Cherries

Premier League-a an season hmasa berah Bournemouth-in English top division mangṭha nghal an duh lo tih an pholang ve zel bawk a, Inrinni zan khan Swansea City chu 2-0 in an hneh - Swans erawh an dinhmun a him ta lo hle.

Bournemouth khelmuala inkhelah goal khung hmasa bertu chu Swansea defender Alfie Mawson a ni a, a pawi ber erawh a goal khung hi an lama a tihluh palh a ni. Welsh club-in an lama an tih luh theihna tura tha thawhtu Benik Afobe chuan minute 72-naah an goal hnihna a khung leh a, Cherries an chak.

Swans tan Gylfi Sigurdsson chu player langsar a ni a, Iceland international free kick pet hi Joshua King chuan an lamah a ti lut teuh hle a, yard 25 vel aṭanga a shot neih chu Cherries goalkeeper Artur Boruc-a'n ṭha zetin a dang bawk. Swansea goalkeeper Lukasz Fabianski lam hmaih theih a ni bik lo a, King-a goal khung tur nia lang chu ṭha takin a dang.

Manager thukhawchang

Bournemouth manager Eddie Howe chuan, "Match hnih chhung a zawnin hnehna kan chang ta a, a zawna goal kan chhuah loh bawk avangin ka hlim a ni. Swansea khan players ṭha tak tak an nei a, kan dan chah theih avangin ka naute khelh danah ka lawm a ni," a ti.

Swansea manager Paul Clement chuan, "Bournemouth kha hnehna chan phu zawk an ni a, chak kan duh chuan kha ai khan goal hmaah kan hriam a ngai a ni," tiin an chak loh chu an thiam loh a nih thu a sawi.



Share this Post

Login to comment
No Comments