La Liga Hmahruaitu Real Madrid an kal zel

Real Madrid chuan Inrinni zan khan 2-1 in Athletic Bilbao an hneh a, La Liga-ah hmahruaitu an nihna an chhawm nung zel. Zinedine Zidane-a naute tan tun hnaia goal a khung theih loh avanga sawisel hlawh tak Karim Benzema-a'n goal hmahruai a khung bakah Casemiro-a'n a khung ve bawk a, Athletic tana Aritz Aduriz goal khungin awmzia a nei thui lo.

Inkhel chu

Athletic Bilbao-in an khelmual San Mames Stadium an hmanthiam an hmingṭhatpui ṭhin a, tun season league match-ah an khelmuala vawi khat chiah tlawm nei chungin Real Madrid an mikhual - an tlawm chhun pawh hi Barcelona lakah a ni a, Real tan hna a awlsam lo.

Mahse, Real-in an hmahruaina chhawm nun ngei an tum tih pholangin minute 25-na lekah goal hmahruai an khung a, Cristiano Ronaldo ball siamsak chu Athletic goalkeeper Kepa Arrizabalaga man hman lohin Benzema-a'n a khung a, San Mames-ah Athletic fan-te an hawihai.

Inkhel boruak a sang a, chawlhlawk hman a nih hmain Casemiro, Dani Carvajal leh Aduriz-te chu yellow card pek vek an ni. Second half ṭan a nih hnu lawkah Aduriz-a'n hun ṭha a nei nghal a, Spanish striker ball tauh hi Keylor Navas leh Sergio Ramos innek buai karah a goal teuh hle.

Athletic an phur

Athletic Bilbao an phur tulh tulh a, si phur zawktu an ni tih inhre reng chungin Real goal an nawr na hle. Mual veilam sirah Inaki William-a'n Marcelo a chhaih mangang tluan chhuak zak a, Liverpool nena sawizawm hlawh mek forward hian minute 64-naah Keylor Navas 'enchhinna' nei mah se Costa Rican keeper hian a chhuah duh tlat lo.

Mahse, minute hnih a liam hman chauh tihah Athletic-in an si phurh an sut ta nge nge. Kum 36-a upa striker Aritz Aduriz chuan a la tar lo tih pholangin penalty area-a Raul Garcia ball tauh luh chu hnai set sawt aṭangin a lo tauh ve leh a, Navas-a tan dan hman chi a ni tawh lo - Aduriz hian tun season-ah goal 17 a khung tling leh der tawh.

San Mames-a Athletic Bilbao fan-te hlim chhung erawh a rei lo. An hlim authawm pawh a reh fel hmain Real-in corner an hmu a, an chhawr ṭangkai nghal bawk. Toni Kroos chuan corner hi petin ball changtu Ronaldo-a'n Casemiro tan a siamsak a, Brazilian midfielder hian a awma la thlain hnai tak aṭangin a khung. Goal dang a lut tawh lo a, 2-1 in Real an chak.

Zidane a pawr duh lo

Real Madrid boss Zinedine Zidane chuan, "Chak harsatna hmun khelmualah hnehna kan chang a, talbuai ṭhin mah ila kan insiamṭha zel thei kha kan vanneihna chu a ni. Hnehna kan chan hi a pawimawh a, hma kan sawn zel a ni. Mahse, kan hmabakah match 11 khelh tur a la awm a, tuna hmahruaitu nih hi pawrna hun a la ni lo. Game harsa tak khelh tur kan la nei nual tih kan hria a ni," tiin a ṭawng uang duh lo.

French manager chuan goal khungtu Benzema fak nghalin, "Karim khan game ṭha tak a khel a, second half-ah Cristiano nena ka lakchhuah chhan chu an pahnih khan chawlh hahdamtir ka duh vang a ni. Ka lawmna ber erawh hnehna kan chang kha a ni," a ti.

Palmas coach bang dawn

Zirtawpni zan khan Las Palmas coach Quique Setien chuan season tawp rualin Spanish club hi a chhuahsan tur thu a puang. Kum 58-a upa manager hian Villarreal laka 1-0 a hnehna an chan hnu lawkah Las Palmas a chhuahsan tur thu hi a puang a, he inkhela goal awmchhun hi Kevin-Prince Boateng khung a ni.

Player a nih laia Atletico Madrid tan pawha lo khel tawh coach hian October 2015 khan Las Palmas hi a zawm a, tla tura rinkai ber pawl an ni ṭhin chungin season hnih chhung chu La Liga-ah a inhamtanpui thei.

Inkhel Results

Las Palmas1 - 0Villarreal

Eibar1 - 1Espanyol

Athletic Club1 - 2Real Madrid

Deportivo Alavés1 - 0Real Sociedad

Real Betis2 - 0Osasuna



Share this Post

Login to comment
No Comments