Champions League khel tur engtin nge an zawn?

Europe-a football inelna sang ber khel tur zawn dan hi hriat fuh loh theih a ni a, group stage khel pha chin club 32 zinga tel hi a awlsam lo. UEFA hnuaia ram hrang hrang ten Europe khawmualpui inelnaa an ram chet ṭhat dan milin quota an nei a, tun season atan hian 2017–18 aṭanga 2020-21 chhunga an chet dan an thlir.

England, Spain Italy leh Germany ten hian UCL-ah club pali, Europa League-ah pahnih leh Conference League-ah pakhat ṭheuh an nei. Spainish club Villarreal chu season liam ta khan La Liga-ah pasarihna chauh an ni a, Europa league champion vanga Champions league quota an neih avangin Europe-a inelna sang berah club panga an thawh dawn.

France leh Portugal-in quota pahnih ve ve an nei a; Russia, Belgium, Ukraine, Netherlands leh Turkey te ram league-a champion ṭheuh an tling nghal bawk. Tihian group stage-a tel nghal hi club 26 an ni a, hmunruak paruk hi a hranpaa zawn ṭhin a ni.

Ram hrang hrang dinhmun tehna UEFA coefficient ranking-ah Scotland hi 14-na an ni a, hemi a nih avang hian Champions League khel thei pahnih an nei. Amaherawhchu group stage an tling nghal lo a, Celtic phei chu second qualifying round-ah an tla. Scottish champion ve meuh Rangers pawhin third qualifying round aṭangin an khel ṭan dawn.

Qualifying round hi chi hnih champions path leh league path hmanga ṭhen a ni a, champions path-ah hian ram khat champion chauh tel theiin quota paruk a awm a, league path hian quota pahnih an nei thung.

Third Qualifying round-ah hian club 12 an awm a, parukin playoff an thleng dawn. Red Bull Salzburg leh Brondby ten playoff hi an thleng tawh a, third qualifying round-a chak team parukin an rawn zawm ang a, team paliin UCL group stage an thleng ang. League path-ah hian team pariat an la dam a, heta ṭang hian team pahnihin UCL group stage an khel ve bawk dawn a ni.